Rrëshqet toka, katër shtëpi në rrezik shembjeje

Të paktën katër shtëpi në fshatin Suç të Matit rrezikojnë të shemben për shkak të rrëshqitjes që ka pësuar toka. Katër shtëpitë e rrezikuara i përkasin fisit Nikolla, ku shkarjet e tokës janë afruar deri në 1 metër larg pragjeve. Shkak i rrëshqitjes, veç reshjeve të shiut, është bërë edhe një rezervuar uji i ndodhur sipër shtëpive. “Prej vitesh, saraçineska e rezervuarit ka mbetur e bllokuar. Kjo ka bërë që niveli i ujit në rezervuar të rritet mbi normën e lejuar”, tregon Pjetër Nikolla, njëri nga kryefamiljarët e banesave të dëmtuara. Sipas tij, aktualisht rezervuari i tejmbushur me ujë ka nisur të derdhet duke mbushur me ujë katet e para të banesave.