Rrugë provizore për trafikun në qendër

“Qeveria të mos zvarrisë shpronësimin e godinës së INSIG, në mënyrë që qytetarët të mos e paguajnë me stres rindërtimin e sheshit “Skënderbej”. Këtë deklaratë bëri dje kreu i Bashkisë së Tiranës gjatë nisjes së punimeve për hapjen e një rruge provizore, që do të devijojë trafikun në qendër. Sipas projektit fillestar, qarkullimi i automjeteve ishte parashikuar të devijonte në unazën e vogël, ku Qeveria duhej të shpronësonte godinën e INSIG. Ne sot po prezantojmë përpjekjen tonë për të hapur rrugë provizore, e cila do të mundë të devijojë trafikun, duke nisur vijimin e punimeve. Shpresoj që pushteti të mos bëjë politikën e mbrapshtë të lënies së gjërave pezull”, u shpreh Rama. Si fillim punimet në Sheshin “Skënderbej” do të fillojnë vetëm në një pjesë të tij, duke lejuar qarkullimin e automjeteve para Hotel “Tiranës”. Trafiku do të devijohet në rrugën “Abdi Toptani”, “Bardhok Biba”, “Urani Pano” dhe rruga pas Pallatit të Kulturës, të cilat kanë nisur të rikonstruktohen.