Ruli: Çmimin e tokës nuk e përcakton "Beketi", por ligji dhe qeveria

Ministri i Ekonomisë dhe Energjetikës, Genc Ruli, ka zhvilluar të
premten takime të hapura me banorë të fshatrave të komunave
të Qesaratit dhe Kurveleshit të Sipërm në rrethin e Tepelenës.
Gjatë një ballafaqimi me banorët e fshatrave Anëvjosë, Qesarat
dhe Iliras, toka bujqësore dhe trualli i të cilëve do të kalojë në proces
shpronësimi, sepse do të mbulohen nga ujërat e liqenit të hidrocentralit
të Kalivaçit, ministri Ruli ka sqaruar të gjitha pretendimet e tyre
lidhur me mënyrën e vlerësimit dhe çmimin e kësaj pasurie. "Hijet e
natës ju kanë mashtruar dhe ju kanë alarmuar para kohe në këtë periudhë
pragzgjedhjesh. Çmimin e tokës nuk e cakton kompania koncesionare
‘Beketi‘ që ndërton hidrocentralin, por e cakton ligji dhe vendimi
i qeverisë shqiptare. Të jeni të sigurt se as ju nuk do të jeni të përjashtuar
nga ky proces i rëndësishëm dhe përcaktues për fatin dhe jetën
tuaj, pasi ju jeni të detyruar të lini tokën, burimin kryesor të të ardhurave
tuaja", ka thënë Ruli në këtë ballafaqim.