Ryshfeti, pranga policit rrugor

Një punonjës i Policisë Rrugore ka përfunduar në prangat e kolegëve të tij, pasi është kapur në flagrancë duke i marrë para një drejtuesi mjeti. Burimet nga Shërbimi i Kontrollit të Brendshëm bënë të ditur se dy net më parë kanë arrestuar në flagrancë Ilir Dautin, punonjës i Policisë së Qarkullimit Rrugor në Tiranë. Arrestimi i tij u bë pranë urës Teknologjike, te kryqëzimi i Rrugës së Kavajës me rrugën "Irfan Tomini". Polici Dauti ka qenë me shërbim në atë zonë, kur ka ndaluar një drejtues mjeti dhe i ka kërkuar ryshfet me qëllim që mos ta gjobisë. Por, aty kanë qenë të pranishëm edhe shërbimet e SHKB-së, të cilët kanë ndërhyrë për ta vënë në pranga. Gjatë marrjes në pyetje, Dauti ka deklaruar se nuk kishte marrë ryshfet, megjithatë, kjo nuk ka mjaftuar për ta shpëtuar nga prangat.