SHBA, rol vendimtar në anëtarësimin e Shqipërisë në NATO

Kryeministri Berisha takon anëtarin e Dhomës së Përfaqësuesve nga distrikti 9-të i Michiganit, Gary Peters
 
Kryeministri Sali Berisha takon Gary Peters, anëtar i Dhomës së Përfaqësuesve nga distrikti 9-të i Michiganit. Berisha i shprehu Peters mirënjohjen e tij të thellë dhe të qeverisë shqiptare për mbështetjen dhe ndihmën e çmuar që qeveria e Shteteve të Bashkuara të Amerikës i kanë dhënë në vijimësi Shqipërisë, gjatë gjithë kësaj periudhe, në përpjekjet e saj për të konsoliduar demokracinë e bazuar në një ekonomi funksionale tregu. Në këtë kontekst, Berisha vlerësoi rolin vendimtar të qeverisë dhe Presidentëve amerikanë për anëtarësimin e Shqipërisë në NATO.
Kongresmeni Gary Peters e falënderoi Kryeministrin Berisha për pritjen e ngrohtë dhe miqësore, duke i konfirmuar, gjithashtu, se ai personalisht dhe Shtetet e Bashkuara të Amerikës mbeten një mik i vërtetë i Shqipërisë dhe kombit shqiptar. Peters e falënderoi Kryeministrin Berisha, në veçanti, për kontributin që qeveria shqiptare po jep në misionet në Afganistan, si dhe për mbështetjen dhe marrëdhënien e ngushtë që qeveria shqiptare ka ruajtur në vijimësi në të gjitha çështjet e sigurisë globale, për të cilat Shtetet e Bashkuara të Amerikës i janë thellësisht mirënjohëse.
Në takim u vlerësuan, gjithashtu, marrëdhënie e shkëlqyer midis dy vendeve. Në veçanti, në takim u vlerësua arritja madhështore e ndërtimit të rrugës së kombit në Shqipëri, arterie që do t’i japë një dimension të ri zgjerimit të bashkëpunimit dhe marrëdhënieve të ngushta vëllazërore midis Shqipërisë dhe Kosovës, por edhe zgjerimit të bashkëpunimit ekonomik, tregtar dhe miqësisë në mbarë rajonin.