SHBA vazhdon sulmet kundër Al Qaedës në Jemen
Zyrtarët ushtarakë të Jemenit kanë thënë se nga sulmet ajrore të Shteteve të Bashkuara janë vrarë së paku 18 militantë të Al-Qaedës.
Këta zyrtarë të Jemenit, që folën me kushte anonimiteti, thanë se cak i këtyre sulmeve ishte baza e këtij grupi terrorist në malin Khanfar, afër qytetit Xhar, në provincën jugore Abjan, që është nën kontrollin e militantëve të Al-Qaedës.
Zyrtarët e Jemenit nuk kanë dhënë shumë detaje për këto sulme, por kanë vlerësuar se Shtetet e Bashkuara i kanë nisur ato, pasi ushtria e Jemenit nuk ka aftësi për aksione të tilla ajrore gjatë natës.
Agjencia Frans Pres ka cituar banorët lokalë, që kanë thënë se aeroplanët e Shteteve të Bashkuara dhe të Jemenit, i nisën sulmet në provincat Abjan dhe al-Bajda, më 9 dhe 10 mars, duke vrarë 33 militantë të Al-Qaedës.