Sadiku, yll i ri në Suedi

Loret Sadiku gjatë dimrit nga ekipi i ligës së dytë suedeze Varnamo, u transferua si një anonim te kampioni aktual i Suedisë, Helsingborg.

Por vetëm pas pesë xhirove të zhvilluara në elitën e futbollit suedez, 20-vjeçari ka dalë nga hija. Ai ka zënë vend në formacionin bazë të ekipit të tij të ri dhe ka mahnitur ekspertët e futbollit në këtë vend me paraqitjet e shkëlqyeshme. “Më vjen mirë që e kam vërtetuar se unë mund të luaj në këtë nivel”, ka thënë Sadiku në një intervistë për ueb faqen fotbollexpressen.se

Talenti kosovar, tek ish-skuadra Varnamo, luante në mesfushë dhe shpeshherë shënonte edhe gola. Por me transferimin te Helsingborgu, ai u bë një qendërmbrojtës ku me sukses po kryen detyrën. Sadiku e ka nisur mirë eksperiencën te Helsingborgu, ku luan edhe Ardian Gashi, ku ka arritur të fitojë edhe trofeun e parë - Superkupën e Suedisë.

Loret Sadiku ka lindur në Kosovë, por lufta e solli atë dhe pjesëtarët e tjetër të familjes në Suedi. Ai filloi të luante futboll në Hanger Nese, kur ai ishte njëmbëdhjetë vjeç derisa pas një viti kaloi te Varnamo.