Salihi dhe Qato, donacione për viktimat e Gërdecit

Hamdi Salihi dhe Kreshnik Qato kanë qenë emrat e radhës të sportit shqiptar që kanë ofruar ndihmë financiare për familjet e Gërdecit. Sulmuesi shqiptar ka bërë të ditur se do të kalojë 1 mijë euro në llogarinë e hapur për të ndihmuar viktimat e kësaj tragjedie të rëndë, ndërsa më pas ka qenë boksieri Qato që ka konfirmuar një donacion prej 1 milion lekësh në ndihmë të familjeve që aktualisht janë pa strehë.

Salihi ka bërë të qartë se shuma prej 1 mijë eurosh nuk ishte domethënëse, por ai e cilësonte këtë si një mënyrë për t‘u qëndruar pranë familjeve që vuajtën nga kjo tragjedi. Një qëndrim i tillë u mbajt edhe nga Qato, i cili saktësoi se do të kishte një motivim më të madh në ndeshjen e radhës, duke u përpjekur që ta fitojë atë për t‘i dhënë sado pak gëzim këtyre njerëzve që aktualisht po kalonin një situatë mjaft të vështirë në jetën e tyre. "Si të gjithë shqiptarët, brenda apo jashtë Shqipërisë, edhe unë jam tronditur nga ngjarja në Gërdec, ku një numër i madh bashkatdhetarësh të mi humbën jetën apo u plagosën. Natyrisht që një ngjarje e tillë më ka prekur pamasë dhe unë ndaj me banorët e asaj zone apo të gjithë ata që humbën të dashurit e tyre, dhimbjen time, duke u shprehur secilit prej tyre, në emrin tim dhe të familjes sime, ngushëllimet më të sinqerta dhe lutjet e mia për viktimat. Ndonëse gjithçka që ne mund të bëjmë, nuk do të mund t‘ua kthejë këtyre njerëzve të afërmit e humbur në këtë tragjedi, unë kam vendosur që nga kursimet e mia personale të kontribuoj në fondin e hapur për këtë qëllim një shumë prej 1 milionë lekësh të vjetra. Ky është një kontribut modest krahasuar me përmasat e kësaj tragjedie, por unë e ndiej si detyrim moral dhe qytetar, për të qenë pranë bashkatdhetarëve të mi në këto çaste të vështira", tha ai, duke konfirmuar se në ndeshjen e radhës me 4 prill, do të kërkonte një fitore për t‘ua dedikuar pikërisht njerëzve të Gërdecit. Një ditë më parë, ishte donatori i Tiranës, Refik Halili, ai që bëri të ditur se merrte përsipër rindërtimin e tri shtëpive në fshatin Gërdec, duke ftuar edhe kolegë të tjerë të vepronin në të njëjtën mënyrë për të ndihmuar ata që vuajtën nga kjo tragjedi.

SSSASS