Sarandë, vuante nga depresioni, vetëvaret 20 vjeçari

Një 20-vjeçar është gjetur dje i varur me litar në një ndërtesë të papërfunduar në qytetin e Sarandës. Punëtorët e ndërtesës kanë konstatuar trupin e pa jetë të një djali që sipas policisë i përket 20- vjeçarit Flaton Shehaj. Forcat e komisariatit të policisë së Sarandës mbërritën menjëherë pranë ndërtesës për të bërë këqyrjen e vendit të ngjarjes. Burime nga policia thanë se nga hetimet e para dyshohet se i riu është vetëvarur. Ndërkohë, trupi i pa jetë i 20- vjeçarit u transportua në morgun e spitalit për ekzaminime të mëtejshme, ndërsa policia ka marrë në pyetje familjarët e të ndjerit për të zbardhur rrethanat e këtij vetëflijimi. Burime nga policia thanë se paraprakisht dyshohet se Shehaj vuante nga depresioni, gjë e cila ka çuar atë në vetëflijim. Megjithatë të njëjtat burime shtuan se po vazhdojnë hetimet për të zbardhur me saktësi shkakun që ka detyruar të riun ti japë fund jetës në një vend të fshehtë.