Sekretari amerikan i Mbrojtjes telefonon ministrin Imami

“Marrim pjesë në dhimbje dhe lutemi së bashku me familjen e kapiten Feti Voglit”, u shpreh Sekretari i Mbrojtjes së SHBA-ve, Leon Panetta, duke shprehur njëkohësisht të gjithë gatishmërinë e qeverisë amerikane, për çdo ndihmë në rast nevoje. Një qëndrim të tillë, Sekretari i Mbrojtjes i Shteteve te Bashkuara të Amerikës, Leon Panetta e bëri me dije gjatë telefonatës që zhvilloi sot pasdite me ministrin e Mbrojtjes, z. Arben Imami, lidhur me aksidentin e ndodhur në Kandahar, ku mbeti i vrarë kapiten Vogli dhe i plagosur rëndë nën tetar Peci.  “Gatishmëria e trupave tuaja për të luftuar deri në sakrificën e fundit është për tu vlerësuar thellë”, tha z. Panetta, ndërsa shtoi se SHBA dhe populli amerikan vlerëson shumë mbështetjen e pandërprerë të qeverisë dhe popullit shqiptar.
Ministri i Mbrojtjes, Arben Imami falënderoi Sekretarin e Mbrojtjes së SHBA-ve për mbështetjen e vazhdueshme që qeveria e SHBA-ve dhe populli i madh amerikan ka dhënë për Shqipërinë dhe Forcat e Armatosura.
“Jemi krenar që ushtarët tanë dhe amerikanë luftuan së bashku me kuraje dhe profesionalizëm të lartë”, u shpreh z. Imami. Ministri i Mbrojtjes shtoi se ne jemi krenarë që ndodhemi bashkërisht në disa operacione në Afganistan.
Ministri Imami i konfirmoi  sekretarit Panetta angazhimin e palëkundshëm të qeverisë shqiptare për të vazhduar kontributin për paqen dhe sigurinë në Afganistan përkrah Shteteve të Bashkuara të Amerikës dhe të gjithë aleatëve të tjerë.