Seminar për rolin i komunitetit shkencor në mbrojtjen civile

TIRANË - Në kuadër të përmirësimit dhe rritjes së nivelit të Shërbimit të Emergjencave Civile, Ministria e Brendshme, në bashkëpunim me organizatën italiane “Formez”, organizuan dje në mjediset e Hotel Tirana Internacional, seminarin me temë, “Roli i Komunitetit Shkencor në kuadër të Mbrojtjes Civile”. Takimi u përqendrua në shkëmbimin e eksperiencave dhe informacioneve, që mund të aplikohen në Shërbimin e Emergjencave Civile në realitetin tonë, përgatitjen e programeve për reduktimin e rreziqeve, si edhe planifikimin për përballimin e emergjencave në të gjitha nivelet. Në fjalën e tij, drejtori i Përgjithshëm i Emergjencave Civile në Ministrinë e Brendshme, Alfred Olli, e vuri theksin në thellimin e bashkëpunimit me institucionet homologe ndërkombëtare në kuadër të përmirësimit ligjor si dhe ngritjen e strukturave të reja funksionale operative në nivel kombëtar dhe lokal si një domosdoshmëri për reagimin me efikasitet ndaj fatkeqësive natyrore. “Bashkëpunimi me institucionet e Gjeoshkencës do të jetë prioritar për Drejtorinë e Emergjencave Civile, me qëllim përgatitjen e studimeve dhe projekteve të posaçme për parashikimin, parandalimin dhe përballimin me dinjitet të katastrofave natyrore”, - theksoi Olli. Ndërsa, drejtori i Departamentit italian të Mbrojtjes Civile, Elvezio Galanti, i pranishëm në këtë aktivitet, tha se “reflektimi për vazhdimësinë e mbrojtjes civile duhet të konsiderohet, si një koncept gjithëpërfshirës”. Duke sjellë eksperiencën e vyer të Italisë në sistemin e mbrojtjes civile, zoti Galanti, u ndal edhe në nevojën e krijimit dhe financimit të grupeve kërkimore shkencore, për fushat të cilat kanë lidhje të drejtpërdrejtë me fatkeqësitë natyrore, me qëllim ndërtimin e skenarëve të mundshëm në kuadër të mbrojtjes civile”. Nisur nga eksperiencat në vend dhe ato ndërkombëtare, u arrit në përfundimin se roli i Komunitetit Shkencor në kuadër të Mbrojtjes Civile gjatë katastrofave natyrore dhe humanitare, duhet të marrë një dimension më të madh dhe vendimtar.

19 Shkurt 2008