Sezoni turistik; MSH nis inspektimet higjeno-sanitare

Në prag të sezonit të ri turistik, Ministria e Shëndetësisë ka organizuar një takim ku ka prezantuar masat parandaluese që do të merren në këtë sezon veror për të shmangur sëmundjet infektive në popullatë. Drejtori i Shëndetit Publik në Ministrinë e Shëndetësisë, Gazmend Bejtja, tha: “Jemi në prag të sezonit turistik, kur dhe duhet të rritet angazhimi i strukturave të Inspektoratit Sanitar Shtetëror në monitorimin e mjedisit, të efekteve të mjedisit në shëndet, monitorimin e plazheve të vijës bregdetare, i ajrit, ujit të pijshëm, veçanërisht në zonat turistike, si dhe monitorimi i ushqimit”.

Vitin e kaluar nuk ka pasur probleme apo shpërthime të epidemive, intoksikacione, ndërkohë MSH-ja po përgatit urdhrin përkatës për të gjitha strukturat shëndetësore për marrjen e masave të duhura, për të pasur një sezon të qetë turistik.

Në takim u prezantua gjithashtu Manuali për Inspektoratin Sanitar Shtetëror, Rekomandimet për Ushqyerjen e Shëndetshme në Shqipëri, si dhe Udhëzuesit e Promocionit të Shëndetit.

Hapet "Panairi i punës"

Për të dytin vit me radhë është zhvilluar në Tiranë, "Panairi i punës", panair ky që u jep mundësinë të rinjve që pas diplomimit, të integrohen menjëherë në tregun privat të punës dhe pranë kompanive të ndryshme.

Panairi është organizuar nga Zyra e Karrierës në Universitetin e New York-ut në Tiranë. Qëllimi i këtij panairi, sipas organizatorëve, është krijimi i mundësive për punësim për studentët që diplomohen këtë vit akademik.

Në këtë panair ishin disa dhjetëra kompani të rëndësishme që veprojnë në tregun shqiptar deri tek institucione shtetërore si Ministria e Ekonomisë dhe Bashkia e Tiranës. Të rinjtë, në pritje të diplomimit, kanë parë nga afër vendet e punës dhe mundësitë që ofrojnë ndërmarrjet private.

Ata kanë plotësuar aplikimet për t’u bërë pjesë e tyre pas diplomimit. Fushat, në të cilat ata kanë aplikuar, janë bankat, siguracionet, telefonia celulare, distribucioni, komunikimi, marketingu, konsulenca financiare deri tek pushteti qendror dhe ai vendor.