Shalsi: “BERZH-i i ka dhënë miratimin kredisë”

Emanuela Sako
Bashkia e Tiranës vazhdon debatet për projektin e Unazës së Madhe. Ajo ka publikuar studimin voluminoz që një firmë e huaj, e kontraktuar nga BERZH-i, i ka bërë analizës financiare të Bashkisë. Eduard Shalsi, nënkryetar i Bashkisë, ka sqaruar se paraprakisht se BERZH-i e ka miratuar këtë kredi. Sipas studimit të kryer, Bashkia e Tiranës i ka mundësitë për të marrë kredinë 20 milionëshe, por edhe një shumë më të madhe se kjo. Shalsi u është kundërpërgjigjur të gjithë atyre zërave që mohojnë mundësitë e Bashkisë për realizimin e projektit të Unazës së Madhe. Shalsi i ka bërë edhe një herë apel qeverisë të vijojë me shpronësimin e objekteve, pasi Bashkia i ofron të gjitha mundësitë e realizimit të projektit. “Edhe për projektin e Unazës së Madhe ka një analizë financiare prej 171 faqesh, e cila është bërë nga një studio e huaj, të cilën e ka kontraktuar BERZH-i dhe mbi bazën e së cilës ne kemi marrë miratimin paraprak. Në këtë analizë është arritur konkluzioni se Bashkia e Tiranës ka kapacitet të thithë një kredi edhe më të madhe se ajo që nevojitet për këtë segment të Unazës së Madhe”, - theksoi nënkryetari i Bashkisë.
Kundërshtimet
Debatet për Unazën e Madhe i nisi kryeministri Berisha, i cili theksoi se qeveria do t’i ofrojë Bashkisë fondet për shpronësimet dhe për ndërtimin e saj. Sipas tij, Bashkia rrezikon të dështojë në sigurimin e kredisë për shkak të performancës së saj të mjerueshme fiskale. Pas kësaj u nxitën reagimet e krerëve të tjerë të politikës, të cilët akuzuan Bashkinë për pamundësinë e realizimit të projektit. Dy ditë më parë ministri i Transporteve, Punëve Publike dhe Telekomunikacionit, Sokol Olldashi, i është drejtuar Bashkisë së Tiranës me një letër, ky zyrtarisht kërkon që t’i dorëzohet projekti për ndërtimin e Unazës së Madhe. Kjo kërkesë shprehet me pretendimin se pushteti vendor e ka të pamundur të zbatojë këtë projekt.
Unaza e Madhe
Bashkia e Tiranës zbardh detajet për ndërtimin e Unazës së Madhe, që do të përshkojë zonat kryesore të kryeqytetit. Pjesë e këtij projekti janë dhe disa vepra madhore që do të shërbejnë për shmangien e trafikut në kryeqytet dhe do të kenë vlera estetike, të cilat do të përmirësojnë infrastrukturën rrugore. Unaza e Madhe është përcaktuar si një nga arteriet kryesore të sistemit rrugor të Tiranës. Ndërtimi i një pjese të Unazës së Madhe, që lidh Rrugën e Durrësit me atë të Kavajës, me një gjatësi 2.2 kilometra, është përfunduar në vitin 1999. Pjesa tjetër do të financohet në fazën e dytë të projektit, nga Rruga e Kavajës deri te Rruga e Elbasanit. Projekti i Bashkisë së Tiranës për ndërtimin e Unazës së Madhe prek atë pjesë të kryeqytetit që nis që nga Shkolla Teknologjike deri te Rruga e Elbasanit. Ndërtimi i një pjese të Unazës së Madhe lidh Rrugën e Durrësit me Rrugën e Kavajës dhe kjo pjesë ka një gjatësi rreth 2.2 kilometra, ku përfshihet edhe zgjerimi. Projekti për këtë rrugë është menduar të kalojë në zonën e Selitës, pranë Kopshtit Botanik dhe Zoologjik, në kodrat mbrapa Parkut të Madh të Tiranës, në Kodrat e Saukut, nga ku do të lidhet me Rrugën e Elbasanit pranë Akademisë së Rendit Publik. Sipërfaqja e tokës që duhet të shpronësohet është rreth 35 hektarë. Përveç tokës së bukës janë parashikuar të shpronësohen rreth 180 banesa private, plotësisht apo pjesërisht.

11 Janar 2009