Shëndetësia, Solis: Konkurrenca në privat do të sjellë zhvillim

Shëndetësia shqiptare nuk do të zhvillohet vetëm për shkak të reformave në shëndetësi, politikave apo gjithçka tjetër që përfshin projekte ambicioze në fushën e zhvillimit dhe profesionalizmit. Ai që do të bëjë që shëndetësia të ecë, madje të hedhë shumë hapa përpara, është edhe sistemi privat, komplementar në politikat shëndetësore, rritjen e kapaciteteve, përmirësimin e gjendjes shëndetësore dhe ofrimin e kujdesit ndaj pacientit. Atë që sot nuk e bën dot sistemi publik, po e ofron sistemi privat, sigurisht jo për 100 për qind të popullsisë, por të paktën për 60 për qind të saj. Dje në inaugurimin e spitalit të ri në periferi të Tiranës, ish-ministri i Shëndetësisë, Leonard Solis, deklaroi se spitalet private mund të krahasohen me vrapuesit dhe sistemi shëndetësor me një garë vrapimi, në të cilën edhe pse fituesi mund të jetë një, ata që e ndjekin mundohen ta arrijnë dhe të rrisin më tepër cilësinë për të qenë të parët. Kjo konkurrencë, por nga ana tjetër edhe ambicia për të rritur kapacitetet profesionale në radhët e mjekëve dhe specialistëve, do të jetë në dobi të pacientit. Por një tjetër pikë për të cilën qendrat private duhet të bëjnë kujdes, është transparenca e kostove, në mënyrë që pacienti ta dijë se sa do t’i kushtojë dhe vlera të mos rritet në mënyrë të zhdrejtë me ditën e qëndrimit në spital. Spitali i ri i inauguruar dje është i pari i cili ka futur një gamë pajisjesh moderne, fjalën e fundit të shkencës, në mënyrë të veçantë aparaturën e akseleratorit linear, një formë “kobaltoterapie” me laser, e cila përdoret në të gjitha spitalet me traditë në Perëndim.