Shenja pozitive për ekonominë europiane, nuk ndryshon norma e interesit

Banka Qëndrore Europiane dha shenja inkurajuese rikuperimi, ndërsa vendosi që të ruajë të pandryshuar normën bazë të interesit, në mbledhjen mujore të drejtuesve të saj.

Norma bazë e interesit mbetet prej 1.0%, normë që favorizon kreditë, në dëm të depozitave dhe që synon të rrisë qarkullimin e kapitaleve në tregjet europiane.

Pavarësisht kësaj shenje pozitive, kreu i Bankës Qëndore Europiane, Mario Draghi, paralajmëroi se ekonomia e Eurozonës vazhdon të përjetojë rreziqe të mëdha dhe është e ekspozuar ndjeshëm nga efektet e mundshme anësore të zhvillimeve që mund të ndodhin në zona të tjera të globit.

Shumë analistë kanë parashikuar se 2012 do të jetë viti më i keq i krizës që ka përfshirë Eurozonën.
BQE nuk ka patur kurrë një tregues më të ulët se 1%, që kur nisi punën e saj me emetimin e monedhës euro 13 vjet më parë.