Shkarkimi i Spahiut PS letër Kryesisë së Kuvendit

26/01/2012  Partia Socialiste shprehet zyrtarisht kundër kërkesës së mazhorancës për të hetuar nënkryetarin e KLD-së Kreshnik Spahiu. Grupi parlamentar socialist shprehet kundër ngritjes së komisionit hetimor që do të hetojë veprimtarinë e tij, me argumentin se procedura e nisur nga demokratët është e frymëzuar nga qëllime të luftës së brendshme politike në radhët e mazhorancës. Argumenti i dytë i dhënë para votimit në seancën plenare lidhet me mungesën e moralit politik të Kryeministrit Berisha në raport me institucionet kushtetuese dhe përpjekja e vazhdueshme për t’i vendosur ato nën kontrollin e ekzekutivit. Nëpërmjet një shkrese, e cila ka firmën e sekretarit për koordinimin në PS Fatmir Xhafaj, ka dërguar në Kryesinë e Kuvendit argumentet kundër kësaj nisme dhe arsyet pse nuk mund të shkarkohet nënkryetari i KLD-së. Sipas opozitës, Kuvendi nuk mund ta shkarkojë nënkryetarin e KLD-së dhe ligjet në të cilat është bazuar kërkesa e PD-së nuk kanë vlerë për këtë rast. Socialistët argumentojnë se kërkesa për shkarkim nuk është në përputhje jo vetëm me Kushtetutën, por as me kuadrin ligjor në fuqi.