Shkojmë në gjykatë, nëse na thërrasin

Zëvendëskryeministri Hajredin Kuçi ka thënë se të gjithë qytetarët e vendit duhet të bashkëpunojnë me organet e drejtësisë dhe ka lënë të nënkuptohet se nëse kërkohet nga gjyqësori edhe kryeministri Hashim Thaçi mund të dëshmojë në rastin e Fatmir Limajt.

Derisa po zhvillohen procese të shumta gjyqësore ndaj ish- drejtuesve dhe pjesëtarëve të UÇK-së, numri dy i Qeverisë, Hajredin Kuçi vlerësoi të enjten pas mbledhje së kabinetit qeveritar se lufta e Ushtrisë Çlirimtare të Kosovës ka qenë e drejtë dhe është zhvilluar sipas normave ndërkombëtare dhe zakoneve të luftës.

Kuçi nuk e ka komentuar direkt deklaratën e deputetit Fatmir Limaj se nëse ngritët aktakuzë ndaj tij do të jenë për dëshmitarë gjithë drejtuesit e Shtabit të UÇK-së dhe kryeministri aktual Hashim Thaçi. Por zëvendëskryeministri Kuçi ka lënë të nënkuptohet se edhe kryeministri Thaçi është i gatshëm që të dëshmojë në rastin Limaj, nëse një gjë e tillë i kërkohet nga gjykata.

“Secili vendim i institucioneve të pavarura në këtë rast i gjyqësorit duhet të respektohet nga çdo qytetar i Republikës së Kosovës”, ka thënë ai.

Kuçi shprehu besimin në pafajësinë e njerëzve që kanë udhëhequr luftën çlirimtare, ndërsa e ka çmuar bashkëpunimin që po tregon me organet e drejtësisë nënkryetari i PDK-së dhe deputeti, Fatmir Limaj.

Kurse në lidhje hetimet që mund zhvilloj edhe Prokuroria e Kosovës me EULEX-in, për ngjarjet e fundit në veri, Kuçi ka thënë se Qeveria e Kosovës nuk ndërhynë në këto punë, por vetëm jep mandatin dhe mbështetjen e gjetjes së kriminelëve.

“Unë besoj që organet kompetente i kryejnë veprimet e tyre, Qeveria e Kosovës nuk është organ që ndërhyn në këto autoritete. Qeveria e Kosovës jep mandatin e plotë dhe mbështetjen e plotë politike, por nëse ka nevojë edhe logjistike. Unë jam i bindur se hetimet po zhvillohen, jam i bindur që do të identifikohen kryerësit e shkeljeve dhe do të thotë që nga vrasja e policit dhe të pikave doganore, por edhe shkeljet e tjera me kontrabandë. Po ashtu, jam shumë i bindur që ata një ditë do të ballafaqohen para ligjit të Republikës së Kosovës”, është shprehur ai.

Ndërkaq për mundësinë e rikthimit të gjykatësve dhe prokurorëve në gjykatën e veriut, zëvendëskryeministri Hajredin Kuçi ka ritheksuar se ende nuk janë krijuar kushtet fizike për kthim, por në momentin që krijohen kushtet punonjësit do të kthehen në atë institucion.