Shkolla në rikonstruksion, 800 nxënës pezull

 

KORÇE - Rreth 800 nxënës të shkollës 9-vjeçare “Sevasti Qiriazi” në Korçë, po bëjnë mësim pasditeve nëpër shkolla të tjera. Shkak është bërë fillimi i restaurimit të kësaj godine pikërisht dje. Bashkia e Korçës pohoi këtë situatë, duke anashkaluar deklaratat e saj për faktin e mungesës së punimeve gjatë muajve të verës. Kryebashkiaku Niko Peleshi bëri të ditur se “punimet në këtë objekt u ndërprenë me kërkesën e Institutit të Mbrojtjes së Monumenteve të Kulturës, pasi në gjysmën e oborrit të shkollës u zbuluan themelet e një kishe të vjetër të Korçës”. Ndërprerja e punimeve në këtë shkollë u bë rreth 9 muaj më parë, për shkak të daljes në sipërfaqe, gjatë hapjes së themeleve, të eshtrave të klerikëve dhe besimtarëve ortodoksë, por edhe të mureve të një kishe të vjetër.                 j.gj