Shkrumbohet banesa nga shpërthimi i gazit
LEZHË - Shpërthen bombola e gazit, duke djegur një apartament në katin e katërt në lagjen “Besëlidhja” të qytetit të Lezhës, në pronësi të shtetases L. V. Ngjarja ka ndodhur në mesditën e së enjtes, ndërkohe që forcat e zjarrfikëseve kanë mbërritur menjëherë në vendin e ngjarjes duke fikur flakët e zjarrit. Sipas shefit të PMNZSH ( Policia e Mbrojtjes ndaj Zjarrit dhe Shpëtimit) të Qarkut të Lezhës, Zef Frani, në banesë janë djegur shumë orendi, por fatmirësisht nuk ka patur pasoja në njerëz. Ky është rasti i dytë i shpërthimit të bombolave të gazit në qytetin e Lezhës brenda këtij muaji. Në rastin e parë mbetën të plagosur nënë e bir si pasojë e shpërthimit të bombolës së gazit, teksa po kryhej zëvendësimi i saj.
Kontrabanda, pranga shqiptarit të Maqedonisë
KORÇË - Sektori i antikrimit ekonomik në Drejtorinë e Policisë së Korçës ka vendosur arrestimin e një 33-vjeçari me kombësi maqedonase, me akuzën se ka transportuar mallra kontrabandë. Sipas njoftimit për shtyp të kësaj drejtorie, rreth orës 20.30 të ditës së mërkurë është vendosur arrestimi i shtetasit Niko Stojani, lindur në fshatin Liqenas dhe banues në Ohër të Maqedonisë. Policia tha se arrestimi i këtij shtetasi u krye, pasi të mërkurën u kap në flagrancë duke transportuar mallra kontrabandë në rrugën Liqenas-Korçë. Gjatë kontrollit të mjetit tip "Mitsubishi" me targë CA 3665 MC, pronë e 33-vjeçarit Stojani, u gjetën 970 bluza, 460 palë bizhame si dhe 60 palë pantallona, të cilat dyshohet se janë futur kontrabandë nga Maqedonia nëpërmjet doganës së Gorricës
27 Qershor 2008