Shpirti luftarak, dhunti e Shaqirit

Shumë shpejt, Xherdan Shaqiri është bërë i dashur në Gjermani, respektivisht në Munich, ku po kalon momentet e para të karrierës, pasi bëri bujë të madhe me Baselin në Zvicër. Futbollisti kosovar e ka dhënë një intervistë për uebfaqen gjermane abendzeitung-muenchen.de, ku ka folur për çelësin e suksesit të tij. 20 vjeçari insiston se shpirti i tij luftarak, e ka ndihmuar që të arrijë deri këtu.

“Unë nuk dorëzohem kurrë. Edhe kur kam mundësi të pakta, luftoj pa u ndalur. Nga kjo kam përfituar deri tash. Unë nuk ia kam frikën askujt. Kam luajtur me yje të futbollit në Ligën e Kampionëve dhe gjithmonë e kam pasur gjakun e ftohtë në fushë”, deklaroi përfaqësuesi zviceran, i cili nuk i frikësohet konkurrencës me Arjen Robben, Franck Ribery, Thomas Muller e Tonny Kroos.

“Secili mund të luftojë. Konkurrenca është e mirë dhe i shërben pozitivisht një ekipi. Unë jam mjaft ambicioz, secili duhet të jetë ambicioz. Natyrisht, duhet të jesh i qetë dhe i durueshëm, duke e pritur rastin që të jepet”, vazhdoi ai. Mundësinë e transferimit në Bayern ai e konsideron si perfekte për t’u zhvilluar. Ekipin Bavarez, mesfushori gjilanas e konsideron si njërin prej më të mirëve në Evropë.