Siri referendumi per Kushtetuten

Qeveria siriane zhvillon një referendum kombëtar mbi Kushtetutën e re, ndërkohë që opozita ka bërë të ditur se do ta bojkotojë atë. Ajo e ka cilësuar votimin e së dielës si një farsë, ndërsa i ka kërkuar sërish presidentit, Bashar al-Assad të largohet nga pushteti.

Kushtetuta e re kërkon zgjedhje të reja për një parlament shumë partiak brenda 3 muajve.

Votimi po zhvillohet, ndërsa në vend vazhdon dhuna. Sipas aktivistëve vetëm të dielën mbi 80 persona në mbarë vendin humbën jetën nga sulmet.

Por qeveria ka kërkuar organizimin e referendumit pavarësisht trazirave, duke ngritur më shumë se 13 mijë qendra votimi për 14,6 milionë votues.

Në televizioni shtetëror janë zhvilluar diskutime për dokumentin e ri, e cila u tregon njerëzve se si të votojnë.

Gjithësesi Kushtetuta është kundërshtuar nga opozita. Disa prej tyre e cilësuan atë si mashtrim, ndërsa referendumin si farsë. Madje ata janë shprehur se regjimi nuk e ka respektuar Kushtetutën e vjetër, e cila përfshin lirinë e fjalës, demostratata paqësore dhe ndalon torturën.

Ndërkaq vazhdon presioni i ndërkombëtarëve ndaj regjimit sirian. Kofi Anan ish-sekretari i përgjithshëm i OKB, i cili është emëruar dhe negociatori për Sirinë nga KB dhe lidhja  arabe, u ka bërë thirrje të gjitha partive të bashkëpunojnë për të gjetur një zgjidhje paqësore për krizën.