Sllovakia: Askush nuk e përkrah bojkotin

 Politika nuk mund të ndërhyjë për të vlerësuar vendimet e gjykatave. Kështu u shpreh dje ministri i Jashtëm i Sllovakisë, Miroslav Lajcak gjatë një takimi me kryeministrin Sali Berisha. Kreu i qeverisë shqiptare shprehu gatishmërinë e maxhorancës për ngritjen e komisionit parlamentar për shqyrtimin e shqetësimeve të ngritura nga opozita, me përjashtim të çështjeve të vendosura tashmë me vendim të formës së prerë nga gjykata. Nga ana e tij ministri sllovak u shpreh se qëndrimi i Kryeministrit Berisha dhe qeverisë shqiptare në respektim dhe mbështetje të institucioneve demokratike dhe të shtetit ligjor është një qëndrim i drejtë që gëzon një përkrahje të gjerë. "Askush nuk e përkrah bojkotin dhe në asnjë rast, politika nuk mund të ndërhyjë për të vlerësuar vendimet e gjykatave. Konkluzionet e Institucioneve Ndërkombëtare të specializuara për zgjedhjet si ato të OSBE/ODIHR, duhen respektuar plotësisht", tha Lajcak. Ndërkohë gjatë takimit me zv.krye-minstrin dhe ministrin e jashtëm, Ilir Meta u bë e ditur se sot do të hapet ambasada sllovake në Tiranë. Ndërkohë edhe Suedia ka bërë të ditur se do të hapë shpejt ambasadë në kryeqytetin shqiptar.