Sollaku: Vendim nul, si të miratohej Berisha kryeministër edhe për 4 vjet

 

Ish-kryeprokurori Theodhori Sollaku e cilëson si antikushtetuese komisionin hetimor “Rama II” dhe konkluzionet e nxjerra mbrëmë në raportin e votuar nga ana e Kuvendit. Raportin e mbrëmshëm të votuar vetëm nga maxhoranca, Sollaku e cilëson si të paefektshëm juridikisht. Doktori i shkencave juridike, lektor i të Drejtës Kushtetuese pranë UET deklaroi se, “unë mendoj se komisioni Xhaferaj nr. 2 dhe konkluzionet e tij ratifikuan përfundimisht një parlament të turpit, një parlament që do mbahet mend gjatë në historinë e parlamentarizmit shqiptar për shkeljet e shumta kushtetuese, një parlament që shërbeu  për të mbuluar bëmat e kryera nga lidershipi burracak i sotëm”. “Është e shkruar e zeza mbi të bardhë në ligj dhe Kushtetutë, që Kuvendi nuk mund të ngrejë në katër muajt e fundit të mandatit të tij komisione hetimore; se këto të fundit janë mjete të kontrollit parlamentar që përdoren nga opozita, sepse maxhoranca i ka të gjitha mekanizmat për të provuar një çështje me rëndësi të veçantë; se aktet me karakter administrativ nuk mund t’i anulojë Kuvendi, por veçse gjykata”, deklaroi Sollaku për “Panorama”. Sipas tij, “ky komision tregoi se lidershipi aktual i ngjan një burracaku, që fshihet pas vendimeve kolegjiale, pasi nëse vërtet do të kishte shkelje ligjore nga kryetari i Bashkisë, kryeministri mund të shfrytëzonte prerogativën kushtetuese duke e shkarkuar nga detyra kryetarin, dhe ky i fundit pas kësaj të shkonte të ankohej në Gjykatën Kushtetuese”. “Nuk u përdor rruga kushtetuese, por u gjet rruga më e shkurtër, duke keqpërdorur gjynahqarë të tipit Xhaferaj, që e kanë çuar në fund të këmbëve personalitetin e deputetit, vetëm për të kapur një vend në listën e deputetëve të ardhshëm”, theksoi Sollaku. Për ish-kryeprokurorin, “vendimi i Kuvendit për nga pasojat është nul, është njësoj sikur Kuvendi të miratonte një vendim që të caktonte edhe për katër vjet të tjera Saliun si kryeministër”.