Sot raporti, Shqipëria notë negative për statusin

Ngërçi që ka shoqëruar jetën politike të Shqipërisë gjatë vitit të shkuar duket se do të penalizojë dhe një herë shqiptarët për sa i përket ëndrrës së tyre integruese europiane. Komisioneri për zgjerimin e BE-së, Stefan Fule, pritet të publikojë sot në Bruksel progres raportin për Shqipërinë, esenca e të cilit tashmë është publikuar dhe nga agjencia zyrtare e BE-së, “EuObserver”, ku thuhet se “Shqipëria ka bërë përparim të kufizuar në mes të një bllokimi politik që nga zgjedhjet e fundit elektorale”. Konstatim ky që do të shoqërohet edhe me mungesën e një përgjigjeje pozitive edhe përsa i përket aspektit të vendit kandidat. Ndërkohë që nga një kopje e këtij progres-raporti përfaqësuesi më i lartë i BE-së në vendin tonë, Etore Sequi, do t’ua dorëzojë gjatë ditës së sotme edhe drejtuesve më të lartë politikë dhe shtetërorë në vend, përfshi këtu kryeministrin Sali Berisha dhe kreun e opozitës, Edi Rama. Ndërkohë që më vonë gjatë pasdites Sequi, siç është bërë traditë tashmë edhe nga paraardhësit e vet, do ta bëjë publik raportin edhe për mediat gjatë një konference të posaçme për shtyp. Ndërkohë që gjatë ditës së djeshme kreu i delegacionit të Bashkimit Europian në Shqipëri, Ettore Sequi, nuk ka pranuar të bëjë asnjë koment sa i përket përmbajtjes së progres raportit të Komisionit Europian për Shqipërinë në vitin 2011, duke ftuar të gjithë të presin publikimin e tij gjatë ditës së sotme. “Nesër kemi shumë gjëra për të thënë.” - tha ambasadori Sequi, në promovimin e revistës “Eurospeak”, e cila do të ketë si bazë informimin e shqiptarëve për integrimin europian.