Stefanovic: Në veri po ndërhyn politika partiake

Ndaj vendimit të të ashtuquajturve përfaqësues të katër komunave me shumicë serbe në veri të Kosovë, për referendumin, nuk duhet të ndikojnë interesat e qendrave partiake por interesat shtetërore, ka thënë për mediat serbe shefi i delegacionit serb në bisedimet me Prishtinë, Borko Stefanovic.

“Ministri Goran Bogdanovic, Oliver Ivanovic ose unë do të vazhdojmë bisedimet nëpërmjet të cilave do të arrijmë deri të zgjidhjet, natyrisht nëse përfaqësuesit e katër komunave arrijë të shkëputen nga përqafimi i politikës ditore apo përderisa mbi ta nuk ndikojnë interesat e ngushta të qendrave të tyre partiake, por interesat shtetërore”, ka thënë Stefanovic duke shtuar se argumentet për heqje dorë nga referendumi edhe më parë u kanë ofruar serbëve të veriut të Kosovës.

Sipas Stefanovicit, qëndrimi i serbëve të Kosovës se nuk u intereson statusi i kandidaturës së Serbisë për në BE, nëse ata duhet të pranojnë institucionet e Kosovës, në fakt nuk është argument i cili përdoret në bisedat me ta.

“Duket që dikush nga qendrat partiake, të themi nga rruga Vëllezërit Jugovic (selia e partisë së Koshtunicës) keqpërdorin dhe mendojnë se po bëjnë strategji të madhe për partin duke ua thënë një argument të tillë”, ka thënë Stefanovic.