Sudani Jugor u bë anëtari i 193-të i OKB-së
Nga Express më 14 korrik 2011 në ora 17:18
Asambleja e Përgjithshme e OKB-së e ka pranuar Sudanin Jugor si anëtarin e 193-të të Kombeve të Bashkuara.
Vota me aklamacion e Asamblesë, pasoi shpalljen e pavarësisë së shtetit afrikan nga Sudani këtë të shtunë.
Sudani jugor arriti pavarësinë, pasi populli i tij votoi për ndarjen nga pjesa tjetër e shtetit në referendumin e janarit, nën kushtet e marëveshjes së paqes që përfundoi luftën 20 vjeçare në mes të veriut dhe jugut të Sudanit.
Sudani qe bërë i pavarur në vitin 1956, por qe pllakosur nga konflikti në mes të veriut dhe jugut.
Shteti i fundit që është pranuar në OKB ka qenë Mali i Zi në vitin 2006, por vetoja e Kinës dhe Rusisë e kanë bllokuar Tajvanin dhe Kosovën që t’i bashkohen trupit botëror. (rel)