Supervjedhja u realizua nga një vrimë e hapur në tunel

Sipas vendimit të gjykatës të datës 07.02.2001, vjedhja ishte bërë nga një vrimë e hapur në pjesën e sipërme të tunelit, ku ishte dhoma e fshehtë, në fshatin Kërrabë e Vogël. Pas kontrolleve të para në tunelet ku ruhej ari nga ana e policisë, u bë edhe një kontroll i imtë në familjet e fshatarëve të Kërrabës. Në disa familje u gjetën sasi të vogla të thesarit. Ahmet Hyka, i cili ishte nga Kërraba e Vogël, u akuzua se kishte vjedhur më 13 mars katër qese me ar. Sipas vendimit, ato kanë qenë lira turke, 1000 copë monedha ari. Kjo vlerë, sipas vendimit, i përket Bankës së Shqipërisë, edhe pse gjatë shqyrtimit gjyqësor drejtori i Bankës nuk e pranoi një gjë të tillë. Enver e Ahmet Hyka dhe Pëllumb Dalti kanë pranuar vjedhjen e thesarit. U tha gjithashtu se një pjesë të madhe të thesarit, të pandehurit e kanë shitur dhe nga shitja kanë blerë sipërfaqe të mëdha toke. Në dyshemenë e dhomës së gjumit të Ahmet Hykës janë gjetur para, të cilat janë përfituar nga shitja e monedhave të arit. Dy vëllezërit, sipas gjykatës, ishin futur në tunel dy herë. Hera e parë në mars dhe e dyta më 14 prill të 1997-s. Në këtë periudhë, duke iu referuar vendimit të gjykatës, ata kishin përfituar nga ikja nga vendi i shërbimit i Blerim Hakës për të marrë një pjesë fare të vogël të arit që u zhduk nga tunelet e Kërrabës.

Ku ishte ruajtur thesari

Thesari i shtetit që në kohën e komunizmit ruhej nëpër tunele. Megjithatë, sipas të dhënave të konfirmuara, sasia e floririt ishte vendosur në tunelet e Kërrabës rreth viteve ‘80, pra 20 vjet para se të grabitej. Më parë, thesari i shtetit shqiptar ruhej në malet e Skraparit, në masa të rrepta sigurie. Mendohet se edhe gjatë kohës së komunizmit, ish-nomenklatura e kohës kishte tërhequr sasi të vogla floriri për shpenzime të ndryshme, por të gjitha figurojnë të dokumentuara dhe të firmosura nga njerëz përgjegjës që kanë bërë tërheqjet.

25 Shtator 2008