Taksat që rriten nga Bashkia Elbasan për vitin 2012

Ja si do të ndryshojnë tarifat për pastrimin dhe ndriçimin, si dhe lekët që duhet të paguajnë prindërit për në kopshte e shkolla

ELBASAN Këshilli bashkiak në Elbasan ka miratuar projektin e Bashkisë për rritjen e taksave për vitin 2012. Propozimi është justifikuar me diferencën e madhe që ka kostoja e disa shërbimeve bazë me tarifat e vendosura për çdo subjekt. Specialistët e Bashkisë propozuan ndryshime në tarifën e pastrimit për biznesin e madh, e cila nga 22.000 lekë në vit bëhet 30.000 lekë në vit; tarifën e ndriçimit për biznesin e madh, e cila nga 15.000 bëhet 50.000. Po kështu, tarifa për familjet për pastrimin nga 700 bëhet 1 mijë lekë në vit; tarifa e gjelbërimit, e cila nga 200 lekë bëhet 300 lekë në vit; tarifa e ndriçimi nga 200 lekë në vit bëhet 500 lekë në vit. Tarifa e ushqimit në çerdhe, nga 135 lekë në ditë bëhet 160 lekë në vit dhe tarifa e ushqimit në kopsht, nga 135 lekë në ditë bëhet 160 lekë në ditë. Bashkia deklaron se tarifat aktuale janë ato të vitit 2007 dhe ndryshimi i tyre ishte i domosdoshëm përballë kostove në rritje të Bashkisë për këto shërbime. Po kështu janë vendosur tarifa të reja për antenat e kompanive celulare deri në 45 mijë lekë në vit, në varësi të madhësisë dhe gjatësisë së tubacioneve; tarifa e shfrytëzimit të truallit publik për tubacione dhe për kabuj telefonikë apo linjë interneti. Këshilli bashkiak ka miratuar me shumicë votash ndryshimet e kërkuara nga Bashkia. Sipas Bashkisë, këto tarifa të reja që aplikohen për kompanitë në rrjetin e komunikacionit, energjisë dhe ujësjellësit do të shtojnë të ardhurat për mirëmbajtjen e rrugëve dhe do të ketë një impakt pozitiv në përdorimin sa më racional të hapësirave publike nëntokësore. Siç konstatohet, taksat rriten veçanërisht për bizneset e nuk rëndojnë shumë mbi familjarët. F.Salliu