Tatimet, urdhër bllokimi për 4255 llogari bankare

Për t‘ia arritur qëllimit të ligjit që përcakton veprimet për të mbledhur detyrimet e papaguara të biznesit, organet tatimore kanë provuar një sërë mjetesh të ndryshme, deri në bllokimin e pasurisë në bankë. Gazeta "Shqip" zbulon të tjera detaje nga puna e bërë gjatë vitit 2008, ku nga Drejtoria e Përgjithshme e Tatim-Taksave doli urdhri për bllokimin e 4255 llogarive bankare, me synim mbledhjeve e detyrimeve që bizneset nuk i kishin shlyer. Pavarësisht aksionit të madh, mësohet se rezultati ka qenë jo i pritshëm. Nga i gjithë totali i pasurisë në bankë, prej rreth 3 miliardë lekësh, tatimet kanë mundur të mbledhin vetëm 183 milionë lekë. Aksionet e kryera rezultuan me sukses vetëm në 812 raste (urdhra bllokim llogarie), ose rreth 19 për qind e totalit të planit. Megjithatë, puna vijon më tej me lëshimin e urdhrave të tjerë, kësaj here bllokim të aktivitetit privat në 1987 biznese, me një vlerë rreth 582 milionë lekë. Edhe këtu nuk u arrit të paktën gjysma e planit, pasi tatimet mblodhën vetëm 60 milionë lekë, ose 6 për qind të vlerës së totalit. Po gjatë vitit 2008 nuk kanë munguar rastet e kallëzimit të biznesit në prokurori, për 73 biznese me vlerë gati 508 milionë lekë. Në këtë pikë i mbetej prokurorisë të vepronte, e cila solli rezultat në favor të tatimeve vetëm për 16 raste. Për këto dhe të tjera raste, KLSH ka ngritur një sërë masash dhe rekomandime.