Të arrestuarit e operacionit “Kollona” nën hetim prej një muaji

TIRANË - Tre personat, e arrestuar të mërkurën në mbrëmje në Tiranë, me rreth 1 kilogram drogë e llojit Heroinë, ishin nën hetim prej një muaji nga Sektori i luftës kundër trafikut të lëndëve narkotike në Policinë e Tiranës, bënë të ditur të enjten për ATSH-në burime zyrtare nga Policia. Sipas burimeve, falë provave dhe fakteve të mbledhura, forcat e policisë së kryeqytetit realizuan operacionin e koduar “Kollona”, duke arrestuar shtetasit, Mehmet Belba 45 vjeç, Elvis Arifaj 24 vjeç dhe Martin Bocaj 22 vjeç, me akuzën e trafikut të lëndëve narkotike. Personat në fjalë, u kapën në kushtet e flagrancës, gjatë shkëmbimit të sasisë prej 1 kg heroinë, e cila u sekuestrua me cilësinë e provës materiale. Gjithashtu atyre iu sekuestrua edhe një shumë prej 400.000 lekë (të reja), të cilat ishin përfituar nga tregtimi i lëndës narkotike, 1 thikë, që plotësonte kushtet e armës së ftohtë si dhe 5 shashka. Nga të njëjtat burime mësohet se materialet e kësaj çështjeje i kaluan për hetime të hollësishme organit të Prokurorisë. Strategjia në luftën kundër trafikut të drogës, që po zbatohet nga strukturat e Policisë Shqiptare, ka rezultuar efikase, sidomos në tre vitet e fundit, kur forca zbuluese dhe goditëse e organeve të rendit për këtë lloj trafiku, ka ardhur në rritje. Sipas të dhënave zyrtare të Drejtorisë së Përgjithshme të Policisë së Shtetit, për periudhën Janar- Korrik 2008, u zhvilluan 20 operacione antidrogë, nga të cilat 5 ndërkombëtare, ku janë arrestuar 224 persona, janë sekuestruar 47 kg Heroinë, 813 gr Kokainë, 2.027 kg hashash, ndërsa janë asgjësuar 80.950 rrënjë bimë narkotike.

29 Gusht 2008