Të burgosurit shqiptarë, greva brenda dhe jashtë vendit

Rreth 180 persona që vuajnë dënimin në Burgun e Shën Kollit në Lezhë kanë hyrë që nga e diela në një grevë urie. Sipas informacioneve nga brenda burgut, të dënuarit kërkojnë përmirësimin e kushteve dhe respektimin e të drejtave që u garanton ligji. Ata kanë hartuar një peticion që ia drejtojnë ministrit të Drejtësisë Enkelejd Alibeaj, por nuk janë të sigurt nëse peticioni ka arritur të dalë jashtë telave me gjemba, pasi administrata e burgut është munduar ta fshehë grevën. Mësohet se në peticion të burgosurit ankohen për një sistem korruptim, mbi të cilin është ndërtuar çdo veprimtari. "Nuk na bëjnë ulje dënimi për sjellje të mirë nëse nuk paguajmë. Nuk na lejojnë të marrim leje, siç e parashikon ligji, nëse nuk paguajmë. Çdo e drejtë, këtu blihet", tha një i dënuar në një lidhje telefonike me gazetën "Shqip". Të burgosurit thonë se administrata po mundohet ta fshehë grevën dhe kërkojnë ndihmën e medias për sensibilizimin e opinionit. Ndërkohë, rreth 4000 të burgosur në Greqi, prej të cilëve 1500 janë shqiptarë, po vazhdojnë një grevë urie, duke kërkuar kushte më të mira në qeli, shkurtimin e afateve të paraburgimit dhe drejtësi të barabartë për të gjithë. Mes tyre, shumë shqiptarë shprehen se në Greqi dënimi i emigrantëve shpesh nuk bëhet mbi krime reale. Në burgje mbahen 1500 shqiptarë, ndërkohë që gjendja e tyre mbetet e mirë dhe pa probleme.