Të dhëna të reja për prejardhjen racore të Obamas

Një firmë gjenealogjike amerikane thotë se ka gjetur prova se presidenti Barack Obama mund të ketë prejardhje afrikane nga nëna e tij, një grua e bardhë nga shteti i Kansasit.

Kompania Ancestry.com me bazë në shtetin Utah thotë se nëna e Obamas, Stanley Ann Dunham, e ka prejardhjen nga një skllav afrikan në koloninë e Virxhinias.

Kompania Ancestry.com thotë se Obama mund të jetë stërnipi i 11-të i një prej skllevërve të parë të dokumentuar të Afrikës në Shtetet e Bashkuara.

Obama ka prejardhje afrikane nga babai i tij nga Kenia.

Ancestry.com thotë se ajo përdori analizat e ADN-së për të mësuar se nëna e Obamas rrjedh nga një familje e përzier racore. Megjithatë, Ancestry.com thotë se nuk mund të ndjekë përfundimisht vijën e plotë të familjes nga sot deri në periudhën e skllavërisë në koloninë e Virxhinias, për shkak të mangësive në të dhënat publike.

Për këtë raport deri tani nuk ka pasur ndonjë koment të menjëhershëm nga Shtëpia e Bardhë apo vetë presidenti Obama.