Tentoi të trafikonte me dokumentin e gruas, belgut i bllokohet pasaporta

• TIRANE - Gjykata e Tiranës vendosi dje bllokimin e pasaportës së 36-vjeçarit nga Belgjika, Marsel Bisiauc, si masë sigurie për garantimin hetimit të tij nga policia shqiptare.Kjo masë u vendos me kërkesë të Prokurorisë së kryeqytetit, e cila ka ngritur ndaj tij akuzën e falsifikimit të pasaportave dhe ndihmës së paligjshme për të kaluar kufirin. Bisiuac, sipas policisë, u arrestua tri ditë më parë në Rinas teksa po tentonte të kalonte një vajzë shqiptare për në Belgjikë. Mësohet se 26-vjeçarja do të kalohej nëpërmjet aeroportit, ku ajo ndodhej me të vëllain. Hetimet paraprake sipas policisë kanë zbuluar se kundrejt një shume të majme të hollash, 36-vjeçari belg, ka falsifikuar pasaportën e bashkëshortes së tij, duke i vendosur gjenealitetet dhe foton e shqiptares. Pasi është zbuluar në Rinas nga policia ai është dërguar në qeli, ndërsa vajza nga Shkodra është lënë e lirë pas marrjes në pyetje. Vetë i akuzuari dje para gjyqtares së gatshme e mohoi këtë akuzë, ndërsa ai dhe avokati i tij mbrojtës kërkuan heqjen e të gjitha masave shtrënguese ndaj tij. Ndërsa prokurori gjatë fjalës së vet kërkoi bllokimin e pasaportës së 36-vjeçarit në mënyrë që ai të mos largohet nga Shqipëria për t'iu shmangur hetimeve. Në fund të seancës, kjo ishte edhe masa që vendosi gjykata.                                      f.m.