Thaçi: Populli i Kosovës solidarizohet me Turqinë
“Në emër të Qeverisë së Kosovës dhe në emrin tim, ju lutem pranoni ngushëllimet më të sinqerta për ju, qeverinë tuaj, popullin turk dhe familjarët e viktimave të tërmetit. Qeveria dhe populli i Kosovës edhe në këto momente të rënda gjenden pranë jush, duke shprehur ndjenjat më të larta të solidaritetit dhe të mbështetjes”, thuhet në telegram.
Një tërmet i fuqisë prej 7.2 ballë të shkallës së Rihterit ka goditur pjesën lindore të Turqisë, si pasojë e të cilit kanë humbur jetën shumë njerëz, si dhe janë shkaktuar dëme të konsiderueshme materiale.
Edhe shefi i diplomacisë së Kosovës, Enver Hoxhaj i ka dërguar një telegram ngushëllimi homologut të tij turk Ahmet Davutoglu, pas tërmetit që ka goditur Turqinë Lindore.
Ministri Hoxhaj ka shprehur solidaritetin e popullit të Kosovës me popullin e Turqisë, duke i ofruar ndihmën e Qeverisë së Kosovës për menaxhimin e kësaj katastrofe natyrore.
“Populli i Kosovës bashkëndjenë me dhembjen e familjeve të viktimave dhe të lënduarve nga kjo katastrofë natyrore. Ky tërmet ka tronditur edhe popullin e Kosovës, i cili i bashkohet lutjeve të popullit të Turqisë”, thuhet në telegram.