"Tirana Cup 2006", një risi në Minifutbollin shqiptar

Gjatë orarit zyrtar, ata i ke të kollarisur, me kravata e kostume të shtrenjta, duke inspektuar ligjshmërinë e subjekteve të biznesit, duke mbikqyrur ecurinë e kredive të dhëna, duke u kujdesur që puna të ecë mirë, duke pritur e përcjellë klientët, e të tjera e të tjera. Ndërsa pasdite, të gjithë të veshur me uniforma ku spikatin ngjyrat dhe elementët që reflektojnë kompanitë, bankat apo institucionet shtetërore ku ata punojnë, ata i ke në fushat e minifutbollit të kompleksit të Pishinave në kryeqytet, duke luftuar, pavarsisht fizikut mbase të pazakontë dhe rangut zyrtar që mbajnë, si të barabartë për suksesin e skuadrës së tyre. Është pikërisht kjo metamorfoza që do të mundësohet nga turneu i futbollit "Tirana Cup 2006", i organizuar nga Instituti Shqiptar për Zhvillimin e Sporteve, i cili nis sot pasdite me pjesëmarrjen e 12 skuadrave që përfaqësojnë 12 kompani apo institucione të ndryshme.
Këto 12 skuadra, janë ndarë në dy grupe dhe, më konkretisht, në grupin A është skuadra e "Western Union", ajo e Ministrisë së Financave, ajo e "AMC"-së, ajo e "Union Bank", ajo e "Raiffeisen Bank" dhe ajo e "DHL"-së, ndërsa në grupin B, shorti ka vënë përballë njëra-tjetrës skuadrat e "Stihl & Viking", Bankës së Shqipërisë, BKT-së, Bankës Popullore, Bankës "Procredit" dhe atë të Doganave. 6 skuadrat e cdo grupi do të ndeshen me njëra-tjetrën, nga një herë, dhe, në përfundim të fazës së ndeshjeve në grupe, dy të parat e cdo grupi, do të vijojnë më tej në fazën me eliminim të drejtëpërdrejtë të gjysmëfinaleve dhe duke kulmuar me finalen e kësaj veprimtarie, e cila synon të bëhet një traditë në sportin shqiptar. Nga organizatorët, janë marrë të gjitha masat për një zhvillim sa më normal dhe të rregullt të ndeshjeve, ndërsa nga ana e tyre, pjesëmarrësit kanë premtuar një seriozitet maksimal.
Ajo që e bën këtë veprimtari më interesante nga të tjerat, është se në përbërjen e këtyre skuadrave do të jenë zyrtarët më të lartë të këtyre kompanive, institucioneve apo bankave, cka nënkupton se, në fushën e blertë, tifozët kanë mundësi të shikojnë figura të njohura të qeverisë, drejtorë bankash apo kompanish, të cilët i gjen rëndom nëpër emisionet televizive apo nëpër faqet e gazetave, duke diskutuar për cështje madhore dhe serioze. Ndeshjet e fazës së grupeve të kësaj veprimtarie nisin sot, duke vijuar në cdo mesjavë, domethënë, ndeshjet e ditës së dytë do të luhen më 21 dhe 22 nëntor 2006, ato të ditës së tretë më 28 dhe 29 nëntor 2006, ato të ditës së katërt më 5 dhe 6 dhjetor 2006 dhe ato të ditës së pestë, më 12 dhe 13 dhjetor 2006. Ndeshjet gjysmëfinale do të luhen më 16 dhjetor 2006, ndërsa finalja luhet më 20 dhjetor 2006.