Tirana përshëndet pavarësinë e Kosovës

 

Tirana zyrtare përshëndet Kosovën në vitin e saj të parë si shtet i pavarur. Krerët më të lartë të shtetit morën pjesë në pritjen e organizuar nga ambasada kosovare në Pallatin e Kongreseve. 
Bamir Topi: Kjo ditëlindje e parë e Kosovës na thërret të nderojmë veprën e atyre, që luftuan dhe dhanë jetën për lirinë, të shprehim mirënjohje për të gjithë ata njerëz të mëdhenj dhe ato shtete mike, të cilat kuptuan, pranuan dhe vendosmërisht u rreshtuan për Kosovën e pavarur e vazhdojnë ta mbështesin atë në rrugën e saj.
Xhon Uithers: Një vit më parë Kosova ishte një zog në kafaz, që vetëm mund të këndonte, tani ai zog është i lirë, Kosova është vendi i njerëzve të lirë. Populli amerikan do t’i qëndrojë përkrah popullit të Kosovës gjatë gjithë procesit për integrim në BE dhe NATO.
Jozefina Topalli: 17 Shkurti 2008 është tashmë pjesë e memories së shqiptarëve dhe e botës mbarë, jo vetëm si dita e lindjes së Kosovës martire, por faqebardhë në përpjekjet e saj titanike për liri dhe të drejta njerëzore, për përkatësinë dhe ëndrrën e saj evropiane, por edhe si dita që shënon ditëlindjen e dytë të shenjtë për kombin tonë.
Sali Berisha: Në një vit jetë, shteti i pavarur i Kosovës është dëshmuar si shtet i qytetarëve të barabartë para ligjit, institucionet e Kosovës janë dëshmuar si institucione të përkushtuara  për lirinë dhe të drejtat e minoriteteve.
Edi Rama: Në përvjetorin e parë të kësaj mrekullie të shekullit të 21-të për shqiptarët e shqiptaret kudo që janë, u uroj nga zemra të gjithëve gëzuar festën e pavarësisë së Kosovës. Në përvjetorin e parë të pavarësisë, uroj të keni sa më shumë energji transformuese në të mirë të njerëzve e sa më shumë mirëkuptim mesveti.
Ilir Meta: I urojmë 1-vjetorin e lindjes së shtetit më të ri të Evropës. Rrugë të mbarë Kosovës, në integrimin evropian të saj, në angazhimin në institucionet ndërkombëtare.
Engjëll Bejtaj: Populli i Kosovës, klasa e saj politike janë të ndërgjegjshëm se integrimi evropian mund dhe duhet të arrihet nëpërmjet rritjes së standardeve demokratike, ndërtimit dhe forcimit të institucioneve të pavarura.