Tirana zhyt në krizë Flamurtarin

 

Tirana i ka shkaktuar një humbje therëse dje Flamurtarit brenda në Vlorë, duke bërë që skuadra e Maganit të rrezikojë seriozisht rënien nga kategoria. Takimi i djeshëm midis dy rivalëve të vjetër nuk ka prodhuar një lojë cilësore, në një kohë që vlonjatët zhvilluan vetëm një 45 minutësh të parë të mirë, ndërsa kampionët në fuqi ishin racionalë në lojën e tyre dhe në pjesën e dytë zgjidhën fatet e takimit sipas shijes së tyre. Flamurtari ishte më agresiv në pjesën e parë dhe tentoi disa herë të realizonte në portën e bardhebluve, por pa sukses, pasi sulmuesit e tij nuk u koordinuan aspak në finalizim e për pasojë mbetën në hije. Tirana shfrytëzoi kualitetet, disiplinimin taktik dhe freskinë fizike për të marrë trepikëshin. Mesfushori i talentuar Jetmir Sefa realizoi pas një rrëmuje brenda zonës në minutën e 54-t, duke i dhënë qetësinë ekipit kryeqytetas. Kapiteni Muka, në një ditë të shkëlqyer, pati disa raste shënimi, por shtylla dhe portieri Halili i mohuan golin. Në fund, në minutën e 89-të, mesfushori Julian Ahmataj realizon golin e dytë pas një gjuajtje të saktë tokazi. Flamurtarit nuk i mbetet as kohë dhe as forcë për të reaguar dhe pranon dështimin e radhës, ndërsa Tirana shfaq shenjat e ringjalljes së saj, duke besuar ende te titulli. Pas kësaj humbjeje, Flamurtari mbetet në vendin e fundit me 10 pikë, ndërsa Tirana kalon në 20 pikë, po aq sa Apolonia e vendit të tretë. Trajneri i Tiranës, Alban Tafaj, përgëzon ekipin e tij për fitoren dhe performancën në fushën e lojës, ndërsa tekniku i vlonjatëve, Gugash Magani, shprehu zhgënjimin e tij për rezultatin dhe lojën e ekipit të tij.