Tiranë; Ministria e Drejtësisë nis dosjen për ekstradimin e Bashkim Drizës

Ish-kreu i firmës piramidale “Populli”, Bashkim Driza, pritet të ekstradohet së shpejti në vendin tonë. Dje, Ministria e Drejtësisë i ka dërguar dosjen hetimore, si dhe vendimin e gjykatës e cila e ka dënuar me 16 vjet heqje lirie në ngarkim të tij ambasadës italiane, e cila do të dërgohet drejt Uruguait, vend në të cilën edhe ra në pranga dy ditë më parë Driza. Vendimi i gjykatës, si dhe të gjitha provat që drejtësia shqiptare posedon kundër Drizës, do të vihen në dispozicion të këtyre autoriteteve, në mënyrë të tillë që të bëhet i mundur ekstradimi. Bashkim Driza, një ndër të fundit krerë të piramidave, u arrestua tri ditë më parë nga Interpoli në kryeqytetin e Uruguait. Driza ishte presidenti i firmës piramidale “Populli”, e njohur si një ndër kompanitë mashtruese më të mëdha në vendin tonë. Ai kishte arritur të mashtronte më shumë se 304 mijë shqiptarë, gjatë viteve 1996-‘97 është vënë në pranga pas shpalljes në kërkim të tij prej më shumë se shtatë vjetësh. Pas arrestimit të tij u konstatua se Driza ishte i pajisur me dy pasaporta, një urugujane dhe një të Republikës Domenikane. Autoritetet shqiptare prej disa kohësh kishin marrë informacione se 60-vjeçari i dënuar në vitin 2001 për mashtrime të qytetarëve shqiptarë, lëvizte i lirë në vendet e Amerikës së Jugut. Pas ndihmës së kërkuar nga homologët është bërë e mundur edhe kapja e tij. Aktualisht Driza ndodhet në masën e sigurisë “arrest me burg”, ndërsa pritet të kryhet edhe ekstradimi i tij. Mbi Bashkim Drizën është ngritur akuza e “mashtrimit në bashkëpunim, në shuma të mëdha”. Pas shembjes së firmave piramidave në shkurtin e vitit të trazuar 1997, 60-vjeçari ishte shoqëruar nga policia, pasi ishte arrestuar. Deri në këtë moment ai kishte mbledhur nga shqiptarët një pasuri prej më shumë se 870 milionë lekësh. Por ditët e tij në qeli do ishin të pakta. Në mars të 1997-s, Driza do të dilte nga burgu, së bashku me mijëra të tjerë të burgosur. Që nga ajo ditë ai nuk ishte shfaqur më në skenë.