Topalli: Të hënën votohet në kuvend imuniteti i Mediut, Opozita braktis seancën, kërkon votimin e dekreteve të presidentit

Kryetarja e kuvendit Jozefina Topalli është shprehur sot në seancën plenare se menjëherë pas seances plenare do të mblidhet Këshilli i Rregullores i cili do të bëjë një raport përfundimtar për heqjen e imunitetit, i cili pritet të dali të Hënën. Po në seancën plenare të të hënës sipas saj do të bëhet heqja e imunitetit të ish-ministrit të mbrojtjes Fatmir Mediu, i akuzuar si shkaktar për tragjedinë e Gërdecit.

Grupi parlamentar i PS-së nga ana tjetër ka kërkuar një datë të saktë për kalimin në kuvend të dekreteve të presidentit. Kryetarja e grupit parlamentar socialist, Valentina Leskaj kërkoi sot në parlament një përgjigje lidhur me këtë. Kryetarja e kuvendit, Jozefina Topalli nuk dha një datë të saktë por tha se: “sapo të vijnë materialet ato do të shpërndahen dhe do të bëhet seanca plenare, por më parë do të hiqet imuniteti i Mediut. Keshtu dekretet e presidentit ngelen te enjten apo te henen tjeter”.  Duke kembengulur ne kalimin sot ne votim te dekreteve te presidentit, opozita ka braktisur seancen plenare.

Para tre ditësh kryetarja e grupit parlamentar e PS-së, Valentina Leskaj, ka deklaruar se PS do të kërkojë futjen jo vetëm në procedurë votimi të dekreteve, por edhe miratimin e tyre me votim të fshehtë. “Në të kundërt do të gjendemi në një udhëkryq me një Gjykatë të Lartë të bllokuar e me një President të Republikës me autoritet Kushtetues të cenuar. Me këtë akt njolloset Kushtetuta, Kuvendi dhe fytyra e Shqipërisë në sytë e botës demokratike”,- tha Leskaj. Ajo deklaroi se PS e konsideron qëndrimin e fundit të mazhorancës ndaj dekreteve të Presidentit të Republikës, si një kërcënim të hapur për pavarësinë e institucioneve kushtetuese dhe ndarjen e pushteteve, si një kërcënim për demokracinë dhe shtetin ligjor.

Deputeti i PD-së, Edi Paloka u shpreh se emrat e dekretuar nga Presidenti janë emra në pozitë në kohën e qeverisjes së PS-së. 

Por grupi Parlamentar i PS, vlerëson se kjo është një përpjekje për të kontrolluar Gjykatën e Lartë, që po bëhet duke përdorur pushtetin legjislativ kundër pushtetit Gjyqësor duke vënë në konflikt artificialisht institucionet. Këto pushtete janë të ndara në Kushtetutë siç janë të ndara dhe rolet mes Presidentit dhe Kuvendit në emërimet e gjyqësorit”, - tha ajo. Leskaj sqaroi se Kuvendi emëron ose jo dekretet e Presidentit të Republikës. “Por nuk mund të refuzojë dekretet duke dhunuar rendin kushtetues dhe bllokuar Gjykatën e Lartë me mjete politike arkaike. Gjykata e lartë sot ka 7 vende bosh, për pasojë vendimmarrja e saj është e bllokuar”, -shtoi ajo. Kryetarja e grupit parlamentar sqaroi se opozita do të votojë pro dekreteve të Presidentit, duke insistuar në të njëjtën kohë që dekretet të futen sipas procedurave të parashikuara në rregulloren e Kuvendit. “Nuk mund të futet në Kuvend raport- komisioni. Në Kuvend duhet të futen dekretet e presidentit për t’u votuar. Mazhoranca në rast se do t’i rrëzojë, le t’i rrëzojë në Kuvend. Ne do të votojmë natyrisht pro dekreteve të Presidentit, pro Kushtetutës së Republikës së Shqipërisë”, - tha ajo.

Çeshtja Mediu, dosja me dokumentet

TIRANË- Mazhoranca ka vendosur t’i japë fund lojës së saj për të zvarritur në maksimum çështjen e imunitetit të ish-ministrit të Mbrojtjes, Fatmir Mediu. Pavarësisht dosjeve të reja të mbërritura dy ditë më parë nga organi i akuzës, Këshilli parlamentar për Rregulloren, Mandatet dhe Imunitetin ka përfunduar dje së hartuari raportin me anë të së cilës i kërkon seancës plenare që t’i japë autorizimin Prokurorisë së Përgjithshme për nisjen e hetimeve ndaj ish-ministrit të Mbrojtjes, njëkohësisht kryetar i Partisë Republikane, Fatmir Mediu, votimi i të cilit duket se është përcaktuar për t’u zhvilluar ditën e hënë. Ashtu siç pritej, mazhoranca dhe opozita edhe në raport nuk kanë arritur që të dalin në një emërues të përbashkët, përsa i përket konstatimeve që bëri Këshilli pas ballafaqimit të fakteve të paraqitura nga prokuroria dhe pretendimeve të shprehura nga vet ish-ministri Mediu për akuzat e ngritura ndaj tij. Dy relatorët, deputeti socialist Besnik Dervishi dhe ai republikan Arian Madhi nuk kanë arritur që të unifikojnë qëndrimet dhe ashtu si edhe në rastin “Basha”, kanë hartuar një raport ku, përveç pikave të përbashkëta, pasqyrohet dhe mendimi i shumicës dhe ai i pakicës.

Opozita

Raporti është hartuar sipas një strukture me tre shtylla kryesore. Në pjesën e parë pasqyrohen akuzat dhe të gjitha pretendimet dhe argumentet kryesorë mbi të cilat prokuroria mbështet kërkesën e saj. Ndërsa në fazën e dytë, raporti jep në vija të përgjithshme vlerësimin që vetë i akuzuari, pra ish-ministri Mediu, ka për faktet dhe pretendimet e prokurorisë. Për të dyja këto pjesë mazhoranca dhe opozita nuk kanë dallim në qëndrimet e tyre. Çështja për të cilën palët nuk kanë rënë dakord lidhet me pjesën e tretë të raportit, ku dhe bëhen konstatimet dhe paraqitet kërkesa për heqjen e imunitetit të deputetit Mediu. Opozita në mendimin e vet, për të shmangur çdo interpretim në lidhje me kërkesën e organit të akuzës i është përmbajtur vetëm vlerësimit se ajo që ndodhi në Gërdec më 15 mars, përbën një ngjarje shumë të rëndë, kjo për shkak edhe të përfshirjes dhe autorizimit nga strukturat e shtetit. Ndërsa në pikat e tjera përfaqësuesit e majtë paraqesin vetëm detyrimet që i lindin Kuvendit për t’i dhënë prokurorisë autorizimin për nisjen e procedimit penal ndaj Mediut.

Mazhoranca

Ndërkohë kundërshtimi i mazhorancës ka të bëjë pikërisht me pjesën e tretë të raportit. Sipas vlerësimit të shprehur në këtë material përfaqësuesit e shumicës nuk bien dakord me trajtimin, sipas tyre, sipërfaqësor që opozita i bën çështjes së akuzave dhe përgjegjësive të Mediut në këtë çështje. Kështu, me këmbënguljen e përfaqësuesve të djathtë në raport është evidentuar fakti se akuza e Prokurorisë se ministri i Mbrojtjes Fatmir Mediu ka shmangur strukturat ushtarake gjatë vendimmarrjes për aktivitetin e demontimit të municioneve në Gërdec, nuk qëndron. Mazhoranca thekson ndër të tjera se strukturat e larta ushtarake dhe institucionet e tjera të sigurisë kanë qenë prezente në hartimin teknik të të gjithë akteve dhe vendimeve që lidhen me këtë çështje. Gjithashtu një konstatim tjetër që bëhet nga deputetët e djathtë është dhe fakti se prokuroria nuk arrin të vërtetojë akuzën se ministri i Mbrojtjes ka ndjekur politika dhe ka nxjerrë urdhra që favorizojnë përfitime të pandershme për firma apo kompani të ndryshme private që kanë marrë pjesë në procesin e demontimit. Megjithatë, pavarësisht kundërshtimeve Këshilli i Imuniteteve, pa përjashtim bie dakord që t’i kërkojë seancës të miratojë kërkesën e prokurorisë për dhënie autorizimi për nisjen e procedimit penal ndaj ish-ministrit Mediu.

Raporti

Qëndrimi i opozitës

Në vlerësim të pretendimeve të paraqitura nga organi i akuzës dhe ish-ministri i Mbrojtjes, Fatmir Mediu, Këshilli për Rregulloren, Mandatet dhe Imunitetin, duke pasur parasysh:

- zbatimin me përpikmëri të procedurave të parashikuara në Rregulloren e Kuvendit;

- evitimin dhe shmangien e vonesave të panevojshme në shqyrtimin e kërkesës së prokurorisë dhe të gjithë procesit në këshill;

- vullnetin e deklaruar të gjithë spektrit politik në favor të mospërdorimit të imunitetit parlamentar kur kërkohet hetimi nga organi i prokurorisë;

- deklarimin e deputetit Fatmir Mediu për të lënë imunitetin parlamentar në shërbim të hetimit të ngjarjes;

- materialet e administruara ku prezumohet se kemi të bëjmë me veprime ose mosveprime, objekt i hetimit penal;

- moskrijimin e asnjë vonese që krijon pengesa për kryerjen e veprimeve hetimore të organit të prokurorisë;

- ngjarja e ndodhur në Gërdec, konsiderohet mjaft e rëndë për shkak edhe të përfshirjes dhe autorizimit nga struktura të shtetit;

- gjithë shoqëria shqiptare është e interesuar për të zbardhur sa më parë të vërtetën mbi tragjedinë e Gërdecit,

i rekomandon Kuvendit të Shqipërisë të votojë pro dhënies së autorizimit për procedim penal ndaj deputetit Fatmir Mediu.

Qëndrimi i shumicës

Nga shqyrtimi i dokumentacionit të paraqitur dhe ballafaqimi i fakteve Këshilli parlamentar Rregullores, Mandateve dhe Imunitetit konstaton se:

1. Pretendimi i organit të akuzës se ministri i Mbrojtjes, Fatmir Mediu, në ushtrimin e funksionit të tij në lidhje me vendimmarrjen për aktivitetin e demontimit të municioneve në Gërdec, ka shmangur strukturat ushtarake nuk qëndron.

2. Strukturat e larta ushtarake, si Shtabi i Përgjithshëm i Ushtrisë dhe institucionet e tjera të sigurisë kanë qenë prezent dhe kanë kontribuar në hartimin teknik të të gjitha akteve dhe vendimeve që lidhen me këtë çështje.

3. Prokuroria me dokumentacionin e vënë në dispozicion nuk arrin të vërtetojë përpara Këshillit akuzën se ministri i Mbrojtjes ka ndjekur politika dhe ka nxjerrë urdhra që favorizojnë përfitime të pandershme për firma apo kompani të ndryshme private.