Topi: Fitorja e PD do të jetë e thellë

10/05/2005  Nëkryetari i Partisë Demokratike, Bamir Topi, e ka cilësuar si serioz sondazhin e zhvilluar nga Instituti Amerikan për Demokraci, por shprehet se fitorja e PD në zgjedhjet e ardhshme parlamentare do të jetë më e thellë. “Fitorja e Partisë Demokratike në zgjedhjet e ardhshme do të jetë dhe më e thellë, por unë dua të vlerësoj sondazhin e bërë nga ky organizëm si një punë serioze. Besoj se shifrat e publikuara do të jenë një shtysë për një rezultat edhe më të favorshëm në zgjedhje“, tha Topi. Nga anketimi i më shumë se 1200 personave, nënkryetari i PD-së kishte dalë si një ndër politikanët që gëzon më shumë popullaritet, duke lënë mbrapa figura të tilla si kryetari i PD-së, Berisha, apo kryetari socialist Nano. „Për sa i përket këtij fakti, nuk dua të bie në nivelet e hipokrizisë dhe të them që nuk më pëlqen vlerësimi i votuesve. Por, gjithsesi, këto shifra më motivojnë për të punuar dhe më shumë në zgjedhjet e ardhshme parlamentare, pasi fitorja nuk mund të jetë individuale“, tha Topi. Në sondazhin e zhvilluar nga NDI, të publikuar një ditë më parë, shpallte fituese PD me 42 për qind të votave, kundrejt 34 për qind të votave që parashikohet të marrë PS.