Topi: Sfida ime, pavarësia e sistemit të drejtësisë

Presidenti i Republikës zhvilloi dje një vizitë pune në qytetin e Burrelit

TIRANË - Sfida më e madhe e Presidentit të Republikës, Bamir Topi, është vendosja e një sistemi drejtësie të pavarur nga të gjitha ndikimet politike, apo edhe ato ekonomike. Kreu i shtetit ka qenë dje në qytetin e Burrelit për një vizitë njëditore pune, ku gjatë takimit me banorët e këtij qyteti, ka folur edhe për institucionet e drejtësisë. "Unë ruaj kontakte të shpeshta, të drejtpërdrejta nëpërmjet letrave dhe informacioneve dhe me popullin e zonës suaj, dhe, natyrisht që është një shqetësim i madh çështja e drejtësisë. Ka qenë objekt i diskutimit gjatë gjithë kësaj periudhe dhe, sfida më e madhe ajo që unë po mundohem të përballoj, së bashku me aktorët e tjerë institucionalë dhe politikë, është vendosja e sistemit të drejtësisë në pozicionin kushtetues, që i takon, dhe i pavarur totalisht nga të gjitha influencat, qofshin këto politike apo ekonomike dhe, ky institucion kaq i rëndësishëm, duhet të jetë në funksion të qytetarëve të thjeshtë, në mënyrë që ai të bindet, se ne do të ndërtojmë në mënyrë definitive shtetin e së drejtës, shtetin që të jetë në funksion të qytetarëve, pavarësisht ku ato jetojnë, nëse jetojnë në Tiranë, në kryeqytet, nëse jetojnë në Burrel, nëse jetojnë nëpër fshatrat e Matit, pra kudo që ata jetojnë, të kenë bindjen që janë të mbrojtur nga shteti ligjor",- tha dje Topi. Gjatë takimit më banorët e qytetit të Burrelit, Presidenti i Republikës bëri thirrje që të gjithë të votojnë e, për pasojë, të aplikojnë paraprakisht edhe për kartën e identitetit. "Duhet patjetër që të merrni pjesë në këtë eveniment shumë të rëndësishëm, që ka të bëjë me administrimin e fateve tuaja, pastaj gjithsecili ka bindjet e veta politike. Unë ju falënderoj për këtë mikpritje dhe, natyrisht që do të jem në një bashkëbisedim nga afër me përfaqësues të pushtetit vendor, por për të trajtuar problemet e drejtpërdrejta që ju keni dhe që keni nevojë t'ia transmetoni dhe Presidentit të Republikës", -tha Topi. Presidenti i Republikës, Bamir Topi, u prit dje nga Kryetari i Bashkisë, Skënder Lleshi, Kryetari i Këshillit të Qarkut, Besnik Murati, prefekti i Dibrës, Xhaferr Seiti, deputetët e zonës, Ndue Shpani, Sali Shehu, Idriz Gjumara dhe Rasim Kaleci, përfaqësues të tjerë të pushtetit vendor, intelektualë dhe personalitete të jetës kulturore dhe shoqërore të këtij qytetit.