Topi: Shteti, shërim ligjor ndaj gjakmarrjes

Presidenti i Republikës, Bamir Topi, u bën apel institucioneve shtetërore që të angazhohen seriozisht në shërimin ligjor të gjakmarrjes. Z. Topi priti dje në Pallatin e Brigadave një grup arsimtarësh nga shkolla të ndryshme të vendit, me rastin e festës së 7 Marsit. Kryetari i shtetit, duke përcjellë emocionet e kësaj dite, tha: "Njeriu asnjëherë nuk duhet të harrojë vitet e shkollës, pavarësisht nga karriera. Madje sa më lart të shkojë në karrierë, aq më shumë ai duhet t’i jetë mirënjohës dhe vlerësues për ata mësues, që kanë kontribuar në formimin e tij". Ai uroi të gjithë mësuesit në këtë ditë feste, kudo ku flitet dhe mësohet shqip, në Kosovë, Maqedoni, Mal të Zi e në diasporë, pasi siç u shpreh Presidenti, “arsimi është mendja e kombit, zemra e tij, është morali i përgjithshëm”. Në këtë ditë të veçantë, Presidenti preku dhe një moment të trishtueshëm, që lidhet me nxënësit e ngujuar, për shkak të plagës së rëndë të gjakmarrjes. Ai apeloi në drejtim të institucioneve për t'u angazhuar në shërimin ligjor të kësaj dukurie.

Modeli “Obama”, Berisha, takim festiv për 7 Marsin

Për herë të parë në Shqipëri, organizohet një takim i madh festiv ku nuk do të mungojë as fushata tip “Obama” me mësuesit dhe akademikët nga mbarë vendi. Kryeministri Sali Berisha do t’i mbledhë sot në Tiranë në orën 11:00 me rastin e festës së 7 Marsit,D së Mësuesit. Burime pranë Kryeministrit bëjnë të ditur se takimi është organizuar me shumë surpriza ku nuk do të mungojë as atmosfera festive, e ngjashme me ato që u panë në fushatën presidenciale të Presidentit të ri të SHBA-së, Barak Obama. Modeli i tij do të praktikohet sot për herë të parë në Tiranë përgjatë paradites së sotme, ku Kryeministri Sali Berisha do të mbajë dhe një fjalim para arsimtarëve dhe akademikëve shqiptarë.