Topi në Serbi për samitin e UNESKO-s

Samiti i UNESCO-s me temë “Arti modern dhe pajtimi në Europën Juglindore” ka çuar kreun e shtetit, Bamir Topi, në Serbi. Presidenti në krye të një delegacioni zyrtar, është nisur dje për në Beograd, ku do të marrë pjesë në Samitin e 9-të Rajonal të UNESCO-s të krerëve të shteteve të Europës Juglindore, që do të mbahet në 1-2 shtator 2011 në vendndodhjen e lashtë arkeologjike të Viminaciumit. Topi do të qëndrojë në Beograd deri në datën 3 shtator, ku natyrisht pritet të zhvillojë takime me homologë të tij, ndërkohë që në seancën plenare do të mbajë dhe fjalën përshëndetëse për këtë takim të rëndësishëm e të përvitshëm rajonal. Në këtë samit pritet të marrin pjesë të gjithë presidentët e rajonit, duke përjashtuar përfaqësuesit e Kosovës. Presidenti Topi viziton për herë të parë, në cilësinë e Presidentit, Serbinë, pasi një vit më parë pati refuzuar të ishte pjesë e samitit të presidentëve të Europës Juglindore në Novi Sad, një samit që mbahet çdo vit, për shkak të situatës politike dhe mospjesëmarrjes së përfaqësuesve të Kosovës.