Torreon, qytet i kartelit të drogës, pret miqësoren

E blinduar nën masa të rrepta sigurie, kombëtarja e Brazilit ka mbërritur në qytetin Torreon të Meksikës, ku të martën do të luajë një ndeshje miqësore kundër skuadrës vendase. Mediat vendas e kanë cilësuar këtë përballje si “sfida e vitit”, ndërsa kjo gjë ka rritur pritshmërinë e tifozëve. Pesë herë kampionët e botës vijnë në këtë miqësore pas fitores së fundit 1-0 kundër Kosta Rikës. E kualifikuar për në Botërorin 2014 si organizatore e këtij kompeticioni, skuadra braziliane ka një program të ngjeshur me miqësore, pasi trajneri Mano Menezes kërkon të provojë të gjithë lojtarët pretendentë për të veshur fanellën e përfaqësueses. Tekniku dhe skuadra e tij kanë të gjithë presionin mbi vete, sidomos pas dështimit në dy kompeticionet e fundit në Botërorin 2010 dhe Kupën e Amerikës 2011. Por, miqësorja e radhës kundër Meksikës ka një specifikë të vecantë, pasi do të zhvillohet në një prej qyteteve të cilësuar si një nga qëndrat e kartelave të drogës. Pikërisht në këtë qytet, në muajin gusht një ndeshje e kampionatit vendas u ndërpre si pasojë e një përplasjeje me armë mes dy grupeve krinminale jashtë stadiumit. Për këtë arsye, policia lokale ka njoftuar për masa të rrepta sigurie gjatë miqësores mes Meksikës dhe Brazilit.