Tragjedia e Himarës, dy vajzat që po kurohen në Austri ende në koma

Autobusi i aksidentuar

I PËRDITËSUAR -11:20 Mjeku i spitalit Ushtarak, Luan Nikollari, ka thënë se gjendja e dy vajzave të plagosura në aksidentin tragjik në Himarë, të cilat po kurohen në Vjenë të Austrisë është e stabilizuar, por ato ende vijojnë të jenë në koma.

Gjendja e vajzave në Austri është e stabilizuar dhe nuk kanë përkeqësime. Eriselda Gubere vazhdon të jetë e stabilizuar, por e pashkëputur nga koma, mjekët e kanë gjykuar të jetë kështu edhe për pak kohë,- tha mjeku Nikollari.

Ndërkohë për studenten tjetër, Florije Peçi, është mësuar se sot do të bëhet një tentativë zgjimi, për ta shkëputur nga koma, ndërsa është shtyrë për javën e ardhshme prova për studenten tjetër Eriselda Gubere. Për këtë të fundit, mjeku Nikollari theksoi se mund t`i nënshtrohet një ndërhyrje kirurgjikale edhe në gjendjen e ndodhur aktualisht.

Florije Peçi ka dëmtime në kokë, trup dhe shtyllën kurrizore, ndërsa Eriselda Gubere ka dëmtime të shpretkës, hemorragji të brendshme, dëmtime të veshkës si dhe të disa vertebrave të zonës së kurrizit.

Nikollari theksoi se në Vjenë është një mjek kosovar që ndjek gjendjen e 2 studenteve, ndërsa vuri në dukje se komuniteti shqiptar në Austri ka ofruar ndihmën për vajzat e aksidentuar.

Është e paimagjinueshme sesa shqiptarë dhe kosovare janë afruar në spital dhe kanë ofruar ndihmën për 2 vajzat tona. Një nismë e tyre që është për tu përshëndetur, tha Nikollari.

Sa i përket vajzave të tjera të cilat mjekohen në spitalin Ushtarak, NIkollari ka theksuar se, gjendja e tyre është e përmirësuar dhe gjykohet se ato mund të lënë së shpejti spitalin.

Tragjedia e Himarës, dy studente dërgohen në Austri

16:30 Dy studentet e plagosura në aksidentin tragjik në Himarë po përgatiten të nisen drejtë Austrisë për të marrë një trajtim mjekësore më të specializuar. Florie Peci dhe Eriselda Zyberi, prej ditës së aksidentit ndodhen në gjenje kome.

13:50 Nuk ka pasur dëmtim të sistemit të drejtimit apo frenimit por shkak ka qenë shpejtësia. Ky është konkluzioni i nxjerr nga Policia e Shtetit për aksidentin tragjik në Himarë, ku humbën jetën 14 persona. Sipas policisë autobusi ka hyrë me shpejtësi në kthesë dhe se ka çarë gomën e krahut të majtë gjatë fërkimit me bordurën mbrojtëse të rrugës. Në bazë të konluzioneve të policisë, autobusi ka qenë duke lëvizur me një prejtësi 40 km/h në një kohë kur në atë segment lejohet një shpejtësi deri në 20 km/h. Nga ana tjetër thuhet se sinjalistika dhe gjendja e rrugës ka qenë e mirë.

Nga këqyrja e gjurmës së frenimit në vendin e ngjarjes rezulton se në momentin e aksidentit sistemi i frenimit të automjetit ka funksionuar, por nuk ka qenë i suksesshëm në eliminimin e aksidentit, pasi bazuar në provat e fiksuara në vendin e ngjarjes dhe gjurma e frenimit, shpejtësia ka qenë më e madhe se ajo e lejuar në këtë aks rrugor dhe drejtuesi i mjetit ka reaguar me vonesë për të ulur shpejtësinë e mjetit të mësipërm”, tha zëdhësja e Policisë së Shtetit.

07:29 Dy prej të plagosurave nga tragjedia e Himarës do të dërgohen për mjekim të specializuar nga Austri.

Spitali Ushtarak i ka drejtuar një kërkesë për transport ambasadës austriake në Tiranë, pasi një gjë e tillë mund të realizohet vetëm me avion sanitar. Një lajm i tillë është konfirmuar edhe nga ministri i Shëndetësisë, Petrit Vasili.

Pritet që dy të plagosurat, Florie Peci dhe Eriselda Zyberi, të cilat që prej ditës së aksidentit ndodhen në gjendje kome, të nisen sot drejt Vjenës.

08:30 Vazhdon të jetë e rëndë gjendja e tre prej vajzave të plagosura që ndodhen në Spitalin Ushtarak.

Paraditen e sotme, mjekët bënë të ditur se Kaltra Pollozhani dhe Eriselda Zyberi janë ende në gjendje të rëndë, pavarësisht se gjatë natës nuk kanë pasur komplikime.

Kritike mbetet gjendja e Florie Pecit, e cila ndodhet end ende në gjendje kome. Ndërkohë, pritet që mbledhja e stafit mjekësor të Spitalit Ushtarak të vendosë nëse ndonjëra nga vajzat është në gjendje të përballojë udhëtimin drejt klinikave të huaja jashtë vendit, me të cilat Ministria e Shëndetësisë ka vendosur kontakte.

21:00 Tre prej vajzave të plagosura nga aksidentin tragjik në Himarë, që po marrin mjekim të specializuara në Spitalin Ushtarak të Tiranës, ndodhen në gjendje kritike. Një prej tyre ndodhet në koma ndërsa dy të tjerat paraqiten në gjendje të rëndë dhe mund të dërgohen jashtë Shqipërisë.

Drejtori i Politraumës, Sami Koçeku, është shprehur se dy prej tyre mund të dërgohen edhe jashtë vendin për një trajtim akoma edhe më të specializuar.

Po bëjmë maksimalen për të ndihmuar njerëzit në nevojë, në rast se kemi nevojë do transportojmë jashtë vendit Eriseldën dhe Florijen. Eriselda është politraumë e mirëfilltë. Ka dëmtuar mjaft rëndë shpretkën. Ka një veshkë unike, ne e fusim tek të sëmurët serioz. Florieje Peçi, krahas politraumës ka dhe frakturë në shtyllën kurrizore. Duke u nisur nga një sensibilizim i madh meqë janë të gjitha vajza të reja mendohet se mundet ti transportojmë, deklaroi Koçeku.

18:45 Presidenti i Komisionit Evropiane, Jose Manuel Barroso, i ka dërguar një mesazh ngushëllimi Presidentit të Republikës, Bamir Topi. Barroso ka përcjell ngushëllim në emër të institucionit që përfaqëson dhe në emrin e tij personal për viktimat e tragjedisë së Himarës.

Delegacioni i Bashkimit Evropian në Shqipëri, së bashku me Shefat e Misioneve te Bashkimit Evropian në Shqipëri, dëshirojnë t`u shprehin ngushëllimet më të sinqerta familjeve të viktimave të aksidentit rrugor tragjik që ndodhi dje në Himarë”, thuhet në mesazhin e Barrosos.

Berisha për homazh në Elbasan

18:00 Gjatë vizitës në Spitalin Ushtarak në Tiranë, kryeministri Berisha është shprehur se gjithçka që do të jetë e nevojshme për të plagosurat. Garantoj prindërit që qeveria do të bëjë gjithçka për tu dhënë atyre ndihmën më të specializuar, tha kryeministri. Nga ana tjetër ai shprehu falënderim për ndihmën e shpejtë të dhënë nga banorët e zonës së Bregut në Himarë, mjekët dhe forcat e armatosura, që sipas tij kanë fluturuar jashtë kushteve të lejuara për të shapërtuar jetën e të studentëve të plagosura.

16:35- Kryeministri, Sali Berisha, ka vizituar sot Universitetin Aleksandër Xhuvani në Elbasan ku shprehur ngushëllime me viktimat e tragjedisë së Himarës. Berisha, u shpreh se aksidenti ku humbën jetën 11 studente të këtij universiteti ishte një dramë e madhe.

Ishte një tragjedi dhe zi e madhe, e cila kur je jashtë të vjen edhe dy herë më e rëndë. U shpreh ngushëllimet e mia më të sinqerta, solidaritetin më njerëzor të gjithë prindërve, familjarëve të studentëve që u ndanë nga jeta, në një aksidentet më tragjike që Shqipëria ka njohur, tha kryeministri.

Pas vizitës në Elbasan, Berisha është nisur drejtë Spitalit Ushtarak, ku do të vizitojë studentet e plagosura.