Tre të vrarë pas një sulmi në Milwoki

Tre persona janë vrarë, ndërsa katër të tjerë janë plagosur në qytetin amerikan Milwoki, kur një person i armatosur hyri një qendër relaksimi, në të cilën ka punuar bashkëshortja e tij dhe hapi zjarr ndaj të pranishmëve.

Siç kumtoi shefi i policisë lokale, Daniel Taskhaus, disa orë pas incidentit, sulmuesi, i identifikuar si Redklif Haton është gjetur i vdekur. Sipas Taskhaus, 45-vjeçari Haton ka kryer vetëvrasje.

Taskhaus informoi se Hatoni për policinë kishte qenë i njohur për disa incidente të dhunës familjare, me çka në atë të fundit para dy javësh u arrestua, pasi i kishte shpuar gomat e automobilit të gruas së tij.

Pas kontrollit në qendrën ku u krye sulmi, policia ka gjetur lëndë shpërthyese artizanale, e cila përmbante shishe me propan-butan.

Kryebashkiaku i Milwokit, Stiv Ponto, sulmin e kualifikon si "akt të pakuptimtë të një njeriu".

Ky është sulmi i dytë i ngjashëm në shtetin e Wiskonsinit gjatë këtij viti, pas incidentit të 5 gushtit, kur një veteran lufte vrau gjashtë persona në një tempull të sikëve në Milwoki, pas të cilit ka kryer vetëvrasje.