Tri aksidente me 12 persona të plagosur

LEZHE- DURRES – Tri aksidente me 12 të plagosur janë shënuar dje në qarkun e Lezhës e të Durrësit. Në ngjarjen e parë dy makina janë përplasur mes tyre, nga e cila janë lënduar dy vetë. Aksidenti ndodhi në superstradën Lezhë-Shkodër, kur automjeti tip “Alfa Romeo” dhe një “Audi” janë përplasur mes tyre, në afërsi të kryqëzimit me rrugën dytësore të Kallmetit. Nga të dhënat e para rezulton se një parakalim i gabuar i makinës tip “Audi” ka shkaktuar përplasjen. Drejtuesi i “Alfa Romeos” është dërguar në gjendje të rëndë në spitalin ushtarak. Pak minuta më vonë, një makinë me 5 persona në bord përfundoi në një kanal në anë të rrugës. Ngjarja ndodhi në afërsi të kryqëzimit të Shënkollit. Si rrjedhojë e goditjes së makinës me targa të Krujës me pjesën e betonit mbetën të plagosur udhëtarët. Ndërkaq, në afërsi të Sukthit në Durrës, u përfshinë në aksident dy mjete, një treçikël dhe një Ford me targa të huaja. Të aksidentuarit janë shtetasit Luan Bodlli 34 vjeç, Ismail Qazimi 72 vjeç dhe 16-vjeçari me ineciale C.F., nga fshati Kullë si dhe bashkëshortët nga Tirana Agim dhe Këze Arifi, 46 dhe 36 vjeç. Mjekët thanë se të plagosurit janë jashtë rrezikut për jetën.