Tritoli në Kosovë, bllokohen kontratat në Ministrinë e Mbrojtjes

Oficerët e policisë gjyqësore pranë Prokurorisë së Tiranës kanë bllokuar të gjithë praktikën e ndjekur nga dy ish-funksionarët e arrestuar të Ministrisë së Mbrojtjes për dhënien e licencave për përdorimin e lëndëve plasëse. Organi i akuzës deklaron se qëllimi i sekuestrimit të dokumentacioneve është kryer pasi ka informacione se zyrtarët e Ministrisë së Mbrojtjes kanë abuzuar me dhënien e lejeve për tregtinë e lëndëve plasëse, ndërsa kanë marrë ryshfet në këmbim të lehtësirave të subjekteve private në këtë tregti. Mësohet se në këmbim të lejimit të procedurave për importin dhe eksportin e municioneve për qëllime shërbimi nga civilët, zyrtarët e Ministrisë së Mbrojtjes përfitonin 2 mijë euro për çdo leje. Prokuroria e Tiranës tha dje se ka thelluar hetimet për skandalet e ripërsëritura në Dikasterin e Mbrojtjes, duke faktuar shkelje në Drejtorinë e Menaxhimit të Instalimeve dhe të Burimeve. Dyshohet se firmat private tregtonin "me leje" armë në Kosovë, kryesisht tritol. Gjithsesi, burime nga Task-Forca thanë se hetimet e mëvonshme do të zbulojnë të gjitha dyshimet, ku disa persona kanë marrë ryshfet në këmbim të lejimit të municioneve. Një tjetër masë e organit të akuzës është edhe verifikimi i subjekteve private të kontraktuara nga Ministria e Mbrojtjes për tregtimin e sasisë së municionit te civilët. Është zbuluar fakti se dy pronarët e arrestuar të firmave private, në këmbim të procedurave të përshpejtuara nga Ministria e Mbrojtjes, jepnin ryshfet prej 2 mijë eurosh zyrtarëve. Organi i akuzës tha dje se nga hetimet paraprake janë zbuluar rreth 10 raste, ku dyshimet janë vërtetuar nëpërmjet vëzhgimeve dhe përgjimeve të policisë dhe prokurorisë për të dyshuarit.