Universitetet: Nis informimi për 4 programe

Ministri i Arsimit, Myqerem Tafaj nisi nga Durrësi ditët e informimit për 4 programe kombëtare e ndërkombëtare të kualifikimit të studentëve e pedagogëve. Kreu i Arsimit ka zgjedhur Universitetin “Aleksandër Moisiu” të Durrësit, për të promovuar katër programe që mbështesin kualifikimin e shpejtë të pedagogëve të rinj, të asistentëve dhe të studentëve, në funksion të arritjes së objektivit për afrim sa më të shpejtë me standardet. Në fjalën e tij, ministri Tafaj u shpreh se “sot fillojnë ditët informative për 4 programe shumë të rëndësishme, tre prej të cilave janë programe ndërkombëtare dhe një program me një rëndësi të veçantë kombëtare, që është Fondi i Ekselencës”. Ministri Tafaj u shpreh se “programet e shpallura nga Zyra Tempus janë shumë të rëndësishme, sepse përkojnë me objektivat tona në fushën e arsimit të lartë dhe kërkimit shkencor, si dhe përbëjnë një mbështetje kryesore për realizimin e tyre”. Programi Tempus, që mbështetet nga Bashkimi Europian dhe që ka dhënë një ndihmesë të madhe për universitetet e vendeve post-komuniste, mbështet programet Erazmus dhe Zhan Mone, ku studentët dhe pedagogët aplikojnë vetë në fusha që kanë të bëjnë më shumë me marrëdhëniet ndërkombëtare, integrimin europian etj. Një program tjetër shumë i rëndësishëm, i mbështetur nga Bashkimi Europian, është Programi ERASMUS, që është një program tërësisht individual, ku studentët dhe pedagogët aplikojnë vetë. Ministri Tafaj u shpreh se pjesëmarrja e deritanishme nuk ka qenë fort e kënaqshme, por ky program është pa fond të përcaktuar, që do të thotë që të gjithë aplikantët që janë të suksesshëm me aplikimet e tyre e përfitojnë këtë bursë. Studentët e nivelit Master e Bachelor, në mënyrë të veçantë mund ta shfrytëzojnë këtë mundësi, duke bërë të mundur që studentët shqiptarë të kryejnë një semestër apo një vit studime në një universitet të huaj.