Universiteti i Tiranës dhe Politekniku, 7610 pranime të reja

Dy universitetet më të kërkuara të kryeqytetit, ai i Tiranës dhe Politekniku i kanë propozuar Ministrisë së Arsimit që vitin e ri akademik të pranojnë 7610 studentë të rinj. Më konkretisht, universiteti më i madh i vendit, për nga numri i studentëve, ai i Tiranës, ka propozuar 5620 kuota pranime për vitin e ri akademik 2011-2012, thënë ndryshe 320 studentë më pak se vjet. Deri tani ky është i vetmi universitet që nuk ka propozuar shtim të kuotave të pranimeve, veçse ndryshime të tyre brenda fakulteteve sipas programeve të studimit. Kurse Universiteti Politeknik i Tiranës propozon të pranojë 1540 studentë të rinj, për vitin akademik 2011-2012, për studimet me kohë të plotë. Krahasuar me pranimet e një vitit më parë, sipas propozimeve të bëra nga drejtuesit e Politeknikut, studimet me kohë të plotë gjatë vitit të ri akademik, pranë gjashtë fakulteteve të këtij universiteti, do të kenë mundësi t’i ndjekin vetëm 110 studentë më shumë se vjet.